Тәртіп сақшылары қоғам тәртібін сақтаумен бірге салауатты өмір салтын ұстанады, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, «Динамо» спорт кешенінде полиция бөлімшелерінің 11 командасының қатысуымен волейболдан турнир өтті.

–   Мемлекет басшысының Қазақстан халқына Жолдауының тұрақты басымдықтарының бірі – денсаулық. Көптеген қызметкерлер үшін салауатты өмір салты, мәдениетті өмір сүру нормасына айналды, –  деп қатысушыларды облыстық полиция департаменті арнайы және жұмылдыру дайындығы басқармасының бастығы Ерік Төлегенов құттықтады.

Ойын барысында барлық командалар дене шынықтырудың жоғары деңгейін, өздерінің күш-қуаты мен ойынға деген құштарлығын, сондай-ақ жеңіске деген ерік-жігерін көрсетті. Бірінші орынды Павлодар қаласы полиция басқармасының командасы жеңіп алды. Екінші орынды полиция департаменті аппаратының командасы иеленсе, Аққулы ауданының полиция бөлімінің командасы үздік үштікті түйіндеді.

Павлодар қаласының тәртіп сақшысы Айдос Қайрақан «Турнирдің үздік ойыншысы», полиция департаментінен Асылхан Иманқұлов «Үздік шабуылшы», Аққулы ауданының полиция қызыметкері Олжас Баязитов «Үздік байланыстырушы» атанды.

Жарыс қорытындысы бойынша барлық қатысушылар кубоктармен, медальдармен және бағалы сыйлықтармен марапатталды.