Полиция тұрмыстық жанжал жиі тіркелген мекенжайларда профилактикалық жұмыстар жүргізді, деп хабарлайды @Pavlodarnews.kz тілшісі.

Оңтүстік полиция бөлімінің учаскелік инспекторы Иван Харченко облыстық полиция департаментінің қоғамдық қауіпсіздік басқармасының қызметкерлерімен бірлесіп, бұрын тұрмыстық сипаттағы шақыртулар жиі түскен мекенжайларды тексерді.

Іс-шара барысында қоғамдық тәртіп бұзушылықтар мен жанжалдар тіркелген «проблемалық» пәтерлер қаралды. Тұрғындармен заң талаптарын сақтау, құқық бұзушылық үшін жауапкершілік және қоғамға жат мінез-құлықтың жол берілмейтіні жөнінде түсіндіру жұмыстары жүргізілді.

Сонымен қатар қайталама құқық бұзушылықтардың алдын алу мен қиын өмірлік жағдайға тап болған азаматтарды анықтауға ерекше назар аударылды.

Полиция мұндай профилактикалық шаралар тұрмыстық құқық бұзушылықтарды азайтып, қоғамдық қауіпсіздікті нығайтуға бағытталғанын атап өтті.