Павлодарда құтқарушылар пәтерде қалып қойған тұрғындарға көмекке келді
Олардың біреуі — мүмкіндігі шектеулі қарт әйел, деп хабарлайды @Pavlodarnews.kz тілшісі.
Павлодар қаласында облыстық төтенше жағдайлар департаментінің қызметкерлері бір тәулік ішінде пәтер есігін өздігінен аша алмаған және құтқарушылардың көмегіне мұқтаж болған екі тұрғынға көмек көрсетті.
Алғашқы жағдайда 1970 жылы туған әйелдің пәтер ішінде қалып қойғаны туралы хабарлама түсті. Ол кіреберіс есігін өз күшімен аша алмаған. Пәтерге кіру үшін құтқарушылар үш буынды жылжымалы сатыны пайдаланып, екінші қабатқа көтерілді. Арнайы құралдардың көмегімен терезені ашып, ішке кірген мамандар диванда жатқан әйелді тапты. Оның медициналық көмекке мұқтаж екені анықталды. Құтқарушылар жедел жәрдем бригадасын шақырып, әйелді туыстарына тапсырды.
Екінші жағдайда мүмкіндігі шектеулі егде жастағы әйел пәтерінің кіреберіс есігін өздігінен аша алмай қалған. Оқиға орнына жедел жеткен құтқарушылар арнайы жабдықтың көмегімен пәтерге кіру мүмкіндігін қамтамасыз етті.
ТЖД қызметкерлерінің жедел әрі үйлесімді әрекетінің арқасында азаматтарға қажетті көмек дер кезінде көрсетілді.
Төтенше жағдайлар министрлігі тұрғындарды қарттар мен мүмкіндігі шектеулі азаматтарды назардан тыс қалдырмауға шақырады. Қажет болған жағдайда дер кезінде көмек көрсетіп, 112 бірыңғай құтқару қызметінің нөміріне хабарласу қажет.
