Шаһарда ұлы қазақ ақыны, жырау әрі қоғам қайраткері Жамбыл Жабаевтың туғанына 180 жыл толуына орай бірқатар іс-шаралар өтті, деп хабарлайды @Pavlodarnews.kz тілшісі.

Б. Ахметов атындағы педагогикалық колледжде «Жыр алыбы – Жамбыл» атты салтанатты шара ұйымдастырылды. Іс-шараның мақсаты – ақынның әдеби мұрасын насихаттау, студенттердің ұлттық мәдениетке және қазақ халқының рухани құндылықтарына деген құрметін қалыптастыру болды.

Бағдарлама аясында Жамбыл өлеңдерін мәнерлеп оқу байқауы, «Жүз жыл жырлаған жүрек» атты тақырыптық кітап көрмесі және ақынның өмірі мен шығармашылығына арналған презентация өтті. Студенттер қазақ әдебиетінің дамуына ақынның қосқан үлесі туралы баяндамалар дайындап, оның шығармаларының желісі бойынша шағын сахналық көріністер көрсетті. Әсіресе ақынның патриоттық тақырыптағы шығармалары мен азаматтық ұстанымына ерекше назар аударылды.

Іс-шара студенттердің шығармашылық қабілеттерін дамытуға, дүниетанымын кеңейтуге және Қазақстанның тарихи-мәдени мұрасына деген қызығушылығын арттыруға ықпал етті.

Ал «Жамбыл – халық үні» атты портрет-кешті Орталық балалар кітапханасының қызметкерлері 5-сынып оқушыларына арнап өткізді. Шара барысында оқушыларға Жамбыл Жабаевтың шығармашылығы туралы айтылып, ақынның патриоттық сезімін терең ашатын «Ленинградтық өренім!» атты бейнеролик көрсетілді. Оқушылар «Алатау» және «Қазақстан» өлеңдерін мәнерлеп оқып, поэзияның көркемдігін және Отанға деген сүйіспеншілікті жеткізе білді. Кеш соңында «Өнер туралы ән» шырқалып, әдеби кештің жарқын қорытындысына айналды.

Мұндай кездесулердің өткізілуі ұрпақтар арасындағы байланысты нығайтып, ұлттық мәдениеттің көрнекті тұлғаларына деген мақтаныш сезімін тәрбиелейтіні сөзсіз.