Облыс әкімі келесі жылға арналған жоспарларды баяндап берді, деп хабарлайды @Pavlodarnews.kz.

Қалада абаттандыру және әлеуметтік нысандарды дамыту жұмыстары белсенді жалғасуда.

Шілде айында әуежайдың ұшу-қону жолағын қайта құру аяқталады. Ертіс өзенінде жаңа көпірдің құрылысы жалғасады. «Зеленая роща» аумағындағы облыстық оңалту орталығын қайта құру жобалары Асайын Байхановтың тікелей бақылауында.

Кітапхана жүйесін жаңғырту жұмыстары жалғасын табады. Жақында қаланың ең үлкен 3 кітапханасы толықтай жаңғыртылды, қалған 5 кітапхана келесі жылы жаңартылады.

Трамвай вагондары да жаңартылады. 2026 жылдың бірінші жартыжылдығында бюджет есебінен аккумуляторлық батареялары бар 10 энергия үнемдейтін трамвай сатып алу және «Достық» шағын ауданының айналасына 5 шақырым трамвай желісін салу көзделген.

– Ломов көшесіндегі көліктің жүктемесін азайту және тұрғын үй аумағындағы қозғалысты жеңілдету үшін ұзындығы 6 шақырым жаңа жол салынады. Бұл жол «Қазправда» көшесін жалғастырып, оны Үлкен айналма жолмен қосатын болады, – деді Асайын Байханов. 

Еске сала кетейік, 2026 жылы Павлодарда ірі әлеуметтік нысанның құрылысы басталады. Олардың ішінде мұз сарайы, жаңа футбол стадионы, конгресс-холл және т.б нысандар бар.