Павлодарлық «Майдан жолы» іздеу-зерттеу жасағы Ұлы Отан соғысы жылдарында қаза тапқан Қызыл Армияның екі жауынгерінің туыстарын табуда бұқарадан көмек сұрады, деп хабарлайды @Pavlodarnews.kz тілшісі.

Жауынгерлердің туыстарын іздеу туралы өтінішпен іздеушілерге ресейлік әріптестері жүгінген.

Олардың бірі – Леонид Данилович Александров, 1903 жылы Алматы облысының Талдықорған ауылында туған. Ол Талдықорған аудандық әскери комиссариатынан әскерге шақырылған. Гвардия қызыл әскері атағын алған жауынгер 3-гвардиялық атты әскер корпусында, 6-гвардиялық атты әскер дивизиясының 23-гвардиялық атты әскер полкінде қызмет еткен.

Леонид Александров 1942 жылғы 22 қарашада қаза тапқан. Оның алғашқы жерленген жері Сталинград облысы Калачев ауданындағы Евлампиевский хуторы деп көрсетілген.

2026 жылы Волгоград облысы прокуратурасының Сталинград облысы прокуроры С.В. Бекедов атындағы іздеу жасағы кеңестік әскери тұтқындар болған бұрынғы «Дулаг-205» лагерінің аумағында іздеу жұмыстарын жүргізген. Нәтижесінде жауынгерлердің есімдері анықталып, олардың аты-жөні жазылған жеке заттары табылды. Сол олжалардың арасынан Александровқа тиесілі өлім медальоны да шыққан.

Екінші жауынгер – Бекмурза Юнусбеков, 1919 жылы туған. Табылған өлім медальонындағы жазбаға сәйкес, ол Қазақ КСР-інің Оңтүстік Қазақстан облысы Шымкент қаласының тумасы. Жауынгер Шымкент аудандық әскери комиссариатынан әскерге шақырылған. Медальонда Юнусбековтер әулетінің тегі де көрсетілген.

25 шілдеде «Боспор Поиск» іздеу жасағы Қырым Республикасында Қызыл Армияның үш жауынгерінің сүйегін тапқан. Олардың арасынан 1941 жылғы үлгідегі өлім медальоны табылды. Сүйек қалдықтарының нашар сақталуына қарамастан, медальондағы жазуды оқуға мүмкіндік болған. Оның ішінен Бекмурза Юнусбеков туралы бірдей мәліметтер жазылған екі стандартты бланк шыққан.

Алайда қазіргі таңда медальонның нақты қай жауынгерге тиесілі екенін анықтау мүмкін болмай отыр. Сонымен қатар іздеушілер «Память народа» және «ОБД «Мемориал» электронды базаларынан Юнусбеков туралы мәлімет таба алмаған.

«Майдан жолы» іздеу-зерттеу жасағы екі жауынгердің де туыстарын іздеуді жалғастыруда. Талдықорған, Алматы немесе Түркістан облыстарының тұрғындары бұл есімдерді танып, қаза тапқан жауынгерлердің отбасылары туралы мәлімет бере алады деген үміт бар.

Леонид Александров немесе Бекмурза Юнусбековтің туыстары туралы ақпарат білетін азаматтар павлодарлық іздеушілерге +7 777 461-73-78 нөмірі арқылы немесе «Майдан жолы» іздеу жасағының командирі Александр Шитовтың alex.shitov@mail.ru электронды поштасына хабарласа алады.