Дәстүрлі жәрмеңке 22 тамызға жоспарланған, деп хабарлайды @Pavlodarnews.kz тілшісі.

Облыстық ауыл шаруашылығы басқармасының мәлімдеуінше, сенбі күні яғни 22 тамызда өтетін ауыл шаруашылығы жәрмеңкесі Мемлекет басшысының негізгі азық-түлік тауарларының бағасын тұрақтандыру жөніндегі тапсырмасын орындау аясында өткізіледі.

Жәрмеңке Торговая көшесі, 2А құрылысында, Космонавтар және Торговая көшелерінің қиылысында орналасқан Jailau базарында ұйымдастырылады.

Сату жәрмеңкесіне Аққулы, Ақтоғай, Ертіс, Успен және Павлодар аудандарының, сондай-ақ Павлодар қаласының ауыл шаруашылығы тауар өндірушілері қатысады.

Тұрғындарға жергілікті өндірушілердің ауыл шаруашылығы өнімдерін тікелей сатып алуға мүмкіндік беріледі. Жәрмеңке өңірдегі азық-түлік нарығын тұрақтандыруға және тұрғындарды қажетті өнімдермен қамтамасыз етуге бағытталған.

Сонымен қатар, сенбі күндері осындай ауыл шаруашылығы жәрмеңкелері Екібастұз және Ақсу қалаларында, сондай-ақ облыстың 10 ауданында ұйымдастырылады.