Сертификат босатылғаннан кейін жұмысқа орналасу мүмкіндігін арттырып, табысты әлеуметтік бейімделуге жол ашады, деп хабарлайды @Pavlodarnews.kz тілшісі.

Облыстық қылмыстық-атқару жүйесі департаментінің мәліметінше, 44 мекемесінде сотталғандар үшін ерекше оқу және еңбек бастамасы жүзеге асырылды. Бір топ сотталған токарь-шлифтеу жұмыстары бойынша толық оқу курсынан өтіп, 4-разрядты сертификат алды. 

– Оқу мен тәжірибелік жұмыс «Сова Трансгрупп» ЖШС өндірістік базасында өтті, онда қатысушылар таңғы 8:00-ден кешкі 18:00-ге дейін толық жұмыс күніндей режимде еңбек етті. Бұл – нақты өндіріс жағдайына барынша жақын тәжірибе болды. Бұл жоба тек кәсіби оқытуды ғана емес, сонымен қатар тәрбиелік және әлеуметтік маңызға ие, – делінген хабарламада. 

Біріншіден, курсқа қатысу сотталғандарға сұранысқа ие мамандық алуға, металды өңдеу және шлифтеу дағдыларын меңгеруге мүмкіндік берді. Ал 4-разрядты сертификат олардың кәсіби біліктілігін ресми түрде растады. Бұл – босатылғаннан кейін жұмысқа орналасу мүмкіндігін арттырып, қоғамға бейімделуге жол ашады.

Екіншіден, нақты өндірістік жағдайда оқу мен еңбек ету – қатысушылардың тәртібін, жауапкершілігін және еңбекке деген құрметін қалыптастырады. Белгілі бір жұмыс уақыты мен тапсырмалардың болуы психологиялық тұрақтылық пен еңбек әдетін дамытуға ықпал етеді.

Үшіншіден, бұл бастама жазасын өтеу кезеңін тұлғалық және кәсіби дамуға айналдыруға болатынын көрсетеді. Мемлекет, қылмыстық-атқару жүйесі және бизнес өкілдері бірігіп, жазаны өтеу уақытын мүмкіндіктерге толы кезеңге айналдырып отыр – бұл қайта бейімделу мен жаңа өмірге бастайтын нақты мүмкіндік.

– 4-разрядты сертификат алу – жай ғана құжат емес, ол сенім мен мойындаудың белгісі. Бұл – адал еңбекке дайындықтың, қоғамға жаңа мамандықпен оралуға деген ұмтылыстың және өз күшіне деген сенімділіктің дәлелі, – деді департаменттің баспасөз қызметі.

Осылайша, «Сова Трансгрупп» ЖШС базасында ұйымдастырылған оқыту – қылмыстық-атқару жүйесі мен кәсіпкерлік сектор арасындағы табысты әріптестіктің айқын мысалы. Бұл бастама сотталғандарды еңбек пен білім арқылы түзеудің басты мақсатын тиімді жүзеге асыруға бағытталған.