Байқауға Астана, Алматы, Павлодар, Маңғыстау, Атырау, Қызылорда облыстарының вокалистері мен Ақтөбе колледжінің студенттері қатысты, деп хабарлайды @Pavlodarnews.kz.

Ақтөбе қаласында Ә.Жұбанов атындағы музыка колледжіндегі вокал бөлімінің оқытушысы Николай Таубековтің 70 жылдығына орай ҚР музыкалық колледждері оқушыларының республикалық байқауы және «Шәкірттер шеруі» концерті өтті.

Ережеге сәйкес бірінші турда XVI-XVIII ғасырлардағы опералар мен қазақ композиторларының ариялары, сондай-ақ қазақ халық әндері шырқалды. Екінші турда орыс немесе еуропалық композиторлардың операларынан, Ахмет немесе Ғазиза Жұбановтардың романстарынан арияларды орындаған 12 вокалист қатысты.

Конкурстық комиссияның жұмысына қазылар алқасының төрағасы ретінде Қазақстанның Халық әртісі, ҚР Мемлекеттік сыйлығының лауреаты, кезінде Құрманғазы атындағы консерваторияда мерейтой иесінің ұстазы болған, профессор Шахимардан Әбілов шақырылды.

Павлодар қаласындағы музыкалық колледжінің 3 курс студенті Әсия Дәулетқали Қазақстанның «Вокалистер Одағынан» арнайы сыйлық алды.

Ал колледждің «Вокалдық өнер» бөлімінің 3 курс студенті Г.Т.Әлжанованың шәкірті Әділ Аленов 1-дәрежелі лауреат атанды.