Команда авариялық-құтқару жұмыстары кезеңінде екінші орын алды, деп хабарлайды @Pavlodarnews.kz тілшісі.

Облыстық төтенше жағдайлар департаментінің мәліметінше, өңірдің жас құтқарушылар командасы Көкшетауда өткен Қазақстан Республикасы Төтенше жағдайлар министрлігінің «Жас құтқарушы» республикалық слетіне қатысып, жүлделі орын иеленді.

– Биылғы жарыста еліміздің барлық өңірінен келген 19 команда жеті кезең бойынша өзара бақ сынады. Қатысушылар білімін, төзімділігін, ептілігін және командалық үйлесімділігін көрсетті, – деді ведомствода.

Жарыс қорытындысында павлодарлықтар «Техногендік апат аймағындағы авариялық-құтқару жұмыстары» («жауынгерлік қанат жаю») кезеңінде екінші орынға ие болды.

Облыстық ТЖД баспасөз қызметі атап өткендей, жүлделі нәтиже команданың жоғары дайындық деңгейі мен кәсіби шеберлігін көрсетті.