«Таза Қазақстан» жалпыұлттық экологиялық бастамасы аясында павлодарлықтарды шығармашылық шеберлік сабағына қатысуға шақырады, деп хабарлайды @Pavlodarnews.kz тілшісі.

«EcoUp: Жаңа өмір» атты іс-шара әдетте қоқысқа тасталатын материалдарды қайта пайдалануға арналады. Қатысушылар кәдімгі пластик бөтелкелерден үйге арналған әдемі әрі пайдалы бұйымдар жасауды үйренеді.

Бұл жолы павлодарлықтар пластик бөтелкелерден өз қолдарымен ерекше әшекей қобдишалар жасай алады. Шеберлік сабағы шығармашылық қабілеттерді шыңдауға ғана емес, сонымен қатар саналы тұтыну мен қоршаған ортаға ұқыпты қарау қағидаларымен танысуға мүмкіндік береді.

Жастар бастамаларын дамыту орталығының ұйымдастырушылары пластик бұйымдарды қайта пайдалану тұрмыстық қалдықтардың көлемін азайтып, экологиялық мәдениетті қалыптастыруға ықпал ететінін атап өтті.

Шеберлік сабағына қатысу үшін өзіңізбен бірге бос пластик бөтелкелер алып келу қажет. Олар шығармашылық жұмысқа негізгі материал ретінде пайдаланылады.

Іс-шара 5 қараша күні сағат 16:00-де Павлодар қаласы, Ломов көшесі, 38 мекенжайында өтеді.

«EcoUp: Жаңа өмір» экологиялық бастамасы бастапқы қолданысынан қалған заттарға да екінші өмір сыйлауға болатынын көрсетуді мақсат етеді. Қоршаған ортаға қамқорлық қарапайым әрекеттерден басталады.