Балалардың талпыныстарын қазылар алқасы осы күзде бағалайды, деп хабарлайды @Pavlodarnews.kz тілшісі.

Достық үйінде Қазақстан халқы Ассамблеясының 30 жылдығына арналған «Отбасы – тәрбие іргетасы-2025» фестивалі басталды. Бастамашы – облыстық Қазақстан халқы ассамблеясы жанындағы аналар кеңесі. Ондағы ой – қала мектептері «өз халқын таңдап», тиісті этномәдени орталықпен бірлесе отырып, көрермендерді оның тарихымен, салт-дәстүрімен, асханасымен таныстырады.

Өткен жылы фестиваль тек қазақтардың әдет-ғұрпын көрсетті, бірақ бұл жолы көпұлттылық негізге алынды. Павлодар облысы Қазақстан халқы Ассамблеясы Аналар кеңесінің төрайымы, «Нұр ана әлемі» қоғамдық бірлестігінің төрайымы Бақытжамал Максилова атап өткендей, қазақстандық қоғамның мақсаты бір – бірлік пен келісімді нығайту.

– Қ. Бекхожин атындағы мектептің балалары барлығын өздері жасады, балаларға шамалы ғана бағыт-бағдар бердік, – дейді облыстық тәжік этномәдени орталығының төрағасы Хусайн Гулов. – Достық үйінде көптен бері жемісті жұмыс істеп келеміз, бірақ мұны кейбір балалар білмеуі мүмкін. Сондықтан бұл фестиваль бізге үлкен көмек.

Бастамашылар ретінде «Нұр ана әлемі» қоғамдық ұйымы тұсау кесу рәсімін көрсетті. Бір жасар павлодарлық Томирис есімді қыз өмірдегі алғашқы қадамын жасады. Ардақты аналар балаға ақ батасын беріп, шашу шашты.

Алғашқы болып Болгарияның «Здравец» этномәдени бірлестігімен бірге Малайсары батыр атындағы мектептің балалары өнер көрсетті. Қатысушылар болгарлардың Баба Марта мерекесі туралы әңгімеледі. Балқан халқы көктемді қарсы алып, қолдарына жіптен жасалған тұмар – мартеницалар байлайды екен. Мерекенің пайда болуын Болгар мемлекетінің негізін қалаушы Аспарух ханмен байланыстырады.

Бұл күні барлығы жеті мектеп өнер көрсетіп, жеті этностың мәдениетін қазылар алқасы мен көрермендер назарына ұсынды. Фестиваль мамыр айында жалғасады, ал нәтижелері 2025 жылдың қазан айында жарияланады.