Аталмыш іс-шара Халықаралық балалар кітабы күніне орай өтті, деп хабарлайды @Pavlodarnews.kz тілшісі.

Халықаралық балаларға арналған кітап күні 1956 жылдан бастап, халықаралық кеңестің шешімімен жыл сайын дат жазушысы Ганс Христиан Андерсеннің туған күніне орай аталып өтеді. Көптеген елдерде балалар мен жасөспірімдер кітабы апталығы аясында әлемнің үздік кітаптарына арналған байқаулар, көрмелер, конференциялар мен фестивальдар өткізіледі.

Бұқар жырау атындағы әдебиет және өнер музейінде Халықаралық балалар кітабы күніне орай «Қызықты кітаптар әлемі шақырады» атты көрме ұйымдастырылды.

Көрмеге Мұзафар Әлімбаевтің «Аспандағы әпке», «Аянның алақаны», Мүбәрак Жаманбалиновтың «Балғын гүлдей балақай», «Жауқазын», «Ақын бала», Сүлеймен Баязитовтың «Менің алғашқы кітабым», «Бәлду-бәлду – бәрі өтірік», Есентай Ерботиннің «Бабалар бала болғанда», «Далаға саяхат», Ольга Григорьеваның «Середина сентября» секілді кітаптары қойылды.

Мұражай қызметкері Назымгүл Шапағат кітаптарды оқушыларға таныстырды. Мизан Жұмәлі әннен шашу шашты.