Салтанат Қисатоваға Ховда қаласының Құрметті азаматы атағы берілді, деп хабарлайды  @Pavlodarnews.kz тілшісі.

Облыстық «Шаңырақ» халық шығармашылығы орталығы «Майра» мектебінің жетекшісі, белгілі дәстүрлі әнші, ҚР Мәдениет саласының үздігі Салтанат Қисатова шәкірттерімен бірге Ресейдің Алтай өлкесінде және Моңғолияның Ховда қаласында «Елге сағыныш» атты шығармашылық концертін өткізді.

Екі мемлекетте де жергілікті жұртшылық өнерпазды ерекше ыстық ықыласпен қарсы алып, зор қошеметке бөледі.  

Бұл шараның мақсаты – қазақ мәдениетін, дәстүрлерін және өнерін насихаттау, жастардың шығармашылық қабілеттерін дамыту және ұлттық құндылықтарды сақтау. Кеш барысында шәкірттері ұлттық әндер мен хит әндерді орындап, көрермендерді қазақ халқының бай мәдениетімен таныстырды.

Салтанат Қисатова – 2017 жылы Павлодар қаласы «Мен қазақпын» республиқалық дәстүрлі әншілер, термешілер мен күйшілер телевизиялық мега жобасы облыстық байқауының II орын, 2019 жылы «Тектің сөзі төрісі – терме» республикалық жыршы-термешілер байқауының ІІІ орын, 2021 жылы Майра Шамсутдинованың 150 жылдығына орай өткен республикалық дәстүрлі әншілер байқауының ІІ орын иегері атанған.

2021 жылы Мәшһүр Жүсіп Көпейұлы атындағы республикалық жыршылар мен термешілер байқауында Бас жүлдені жеңіп алған. 

2024 жылы Астана қаласында өткен І Халықаралық сырнайшы-әншілер байқауында ІІ орынға ие болды.

2024 жылы 30 мамыр «Әсем әнім сырнайда» атты алғашқы шығармашылық кеш өтті. ҚР Мәдениет министрінің Құрмет грамотасымен марапатталған. Халықаралық Түркісой ұйымының «Түркісой», «Бейбітшілік Әлемі» одағының «Мәдениет майталманы» медальдарының иегері.

Сондай-ақ ол облыстық «Шаңырақ» халық шығармашылығы орталығындағы «Майра» атында дәстүрлі ән мектебіне жетекшілік етеді. Құрылғанына үш жыл ғана уақыт болса да шәкірттері талай шыңдарды бағындырып үлгерді.