Демалыс орындарында шіріген жемістер мен көкөністер табылды, деп хабарлайды @Pavlodarnews.kz.

Бас прокурордың тапсырмасы бойынша елдің барлық лагерьлерінде прокурорлық тексеріс өтіп жатыр. Павлодар облысының  прокуратурасы Ұлттық комиссия мен уәкілетті мемлекеттік органдардың өкілдерімен бірлесе  11 лагерьде кешенді тексерулер жүргізді. Оның тоғызы – мемлекеттік, екеуі – жеке меншік.   

– Алдын ала тексеру нәтижелері бойынша заңнама талаптарын бұзатын көптеген бұзушылықтар анықталды. Облыстың 11 балалар лагерінде санитарлық нормалар және өрт қауіпсіздігі бойынша ережелер бұзылған, – деді облыстық прокуратураның баспасөз қызметінде. 

Мәселен, балалар лагерінің кейбір қоймаларында мерзімі өткен тамақ пен дәрі-дәрмек, шіріп жатқан жемістер мен көкөністер табылды. 

– Жеке лагерьлерде алкогольдік ішімдіктердің бөтелкелері табылды.  Бір лагерьде жүрген қаңғыбас мал балалардың өмірі мен денсаулығына қауіп төндірді, – делінген хабарламада.

Жалпы лагерьлердің материалдық жабдықталуының жағдайы нашар. Санитарлық тораптардың, душ кабиналарының, матрацтардың, кереуеттер мен шкафтардың тозуы байқалады.

Тексерулер жалғасуда, барлық анықталған бұзушылықтар бойынша прокурорлық қадағалаудың тиісті шаралары қабылданатын болады.