Бұл инфекцияның негізгі көздері – тышқандар, су егеуқұйрықтары, ондатрлар, аламандар, сарышұнақтар және қояндар, деп хабарлайды @Pavlodarnews.kz тілшісі.

Ивановка және Тереңкөл ауылдарында осы қауіпті жұқпалы дерттің екі жағдайы тіркелгенін аудандық санитариялық-эпидемиологиялық бақылау басқармасының басшысы Арман Рақышев хабарлады. 4 және 15 жастағы балалар аталмыш ауруға шалдықты.

Арман Рақышевтың айтуынша, туляремия – лимфа түйіндері, тері қабаттары, кейде көз, жұтқыншақ және өкпені зақымдайтын, қатты улану белгілерімен жүретін зооантропонозды табиғи-ошақтық инфекция.

Адам бұл ауруды кеміргіштердің нәжісімен ластанған азық-түлікті немесе суды ішкен кезде жұқтыруы мүмкін. Сондай-ақ ауруды кенелер, бүргелер, масалар мен бөгелектер шағу арқылы жұқтыру ықтималдығы бар.

Аңшылар үшін ауру жұқтырған жануарлар үлкен қауіп төндіреді – қоздырғыш жануардың терісін сыпыру кезінде терінің зақымдануы арқылы ағзаға түсуі мүмкін.

Ауырған балалар тұратын үйлерде дезинфекция жұмыстары жүргізілді, ал Тереңкөл мен Ивановка ауылдарында аудан әкімдігі дератизация жұмыстарын жүргізуді жоспарлап отыр.

Тереңкөлдің бас санитариялық дәрігері бұл инфекцияның жаппай таралуының алдын алу үшін ұсыныстар берді.

Біріншіден, жеті жасқа дейінгі балаларды, 55 жастан асқан адамдарды және медициналық қарсы көрсетілімдері бар азаматтарды қоспағанда, барлық тұрғындар медициналық мекемелерде туляремияға қарсы вакцина алуы қажет.

Екіншіден, аула аумақтарының тазалығын сақтау, қоқыс пен тағам қалдықтарын қақпағы тығыз жабылатын контейнерлерге тастау маңызды.

Үшіншіден, азық-түлікті кеміргіштер жете алмайтын жерде сақтау, суды жабық ыдыстарда ұстау қажет.

– Кеміргіштердің әрекетінің іздері бар тағамдарды тұтынуға болмайды, сондай-ақ кеміргіштер зақымдаған саңырауқұлақтарды жинаудан бас тарту керек, – деп ескертті Арман Рақышев.

Суды тек қайнатып немесе бөтелкедегі түрінде ішкен жөн, ал қансорғыш жәндіктер мен кенелерден қорғану үшін репелленттерді, қорғаныш жабындарын және торларды қолдану қажет.