Дәл қазір «Саламатты Қазақстан» пойызы Май ауданының Көктөбе ауылында тоқтап тұр, деп хабарлайды @Pavlodarnews.kz тілшісі.

Дәрігерлердің айтуынша, пойызға келетін тұрғындар саны күн сайын әртүрлі. Әсіресе демалыс күндері халықтың қарасы көбейіп, бір күннің ішінде пойыздағы ақ халатты мамандар 380-нен астам адамға қызмет көрсеткен. Орта есеппен алғанда, үлкен ауылдарда күніне кем дегенде 300 адам, ал шағын елді мекендерде сәл аздау қабылданады.

Әрбір науқастың жағдайына байланысты уақыт та әрқалай бөлінеді: қарапайым талдау тапсырып, кеңес алатындарға 10–15 минут жеткілікті болса, диагнозы күрделі немесе шағымы түсініксіз науқастарға дәрігерлер көбірек уақыт бөледі.

Павлодар облысында аса ауыр дертпен келген адамдар тіркелген жоқ. Көбінесе жүрек-қан тамырлары аурулары, жоғары қан қысымы, гемоглобиннің төмендеуі, бронхит пен астманың бастапқы белгілері жиі кездеседі.

– Зауытта істейтін адамдар арасында тыныс жолдары аурулары көп байқалады, – дейді пойыздың аға дәрігері Елнұр Маханов.

Медицина пойызы қазір Май ауданына қарасты Көктөбе ауылында. Мұнда екі күн аялдап, тұрғындарды қабылдайды. Кейіннен құрам Май ауданының Жұмыскер ауылына жол тартады.

– Біздің басты мақсатымыз – шалғай ауыл тұрғындарына қолжетімді, тегін медициналық қызмет көрсету. Әр адам денсаулығын дер кезінде тексеріп, қажетті ем-шарасын алуы үшін осындай жобалардың маңызы зор, – дейді аға дәрігер.

Жылжымалы медициналық пойыз – ауыл халқына жасалған үлкен мүмкіндік. Әсіресе қалаға баруға уақыты немесе мүмкіндігі жоқ адамдар үшін бұл жоба – шынайы көмек. Тұрғындар өз денсаулығын тексертіп қана қоймай, мамандардан кәсіби кеңес алып, қажет жағдайда ары қарайғы емдеу курсына жолдама алады.

Еске сала кетейік, бригада құрамында 15-тен астам бағыт бойынша дәрігерлер жұмыс істейді, оның ішінде: терапевт, хирург, педиатр, невропатолог, офтальмолог, тіс дәрігері, кардиолог, гинеколог, психолог, отоларинголог, ультрадыбыстық маман, рентгенолог.