Қанатты достар Ертістің жылы ағысын ұнатып, осында тұрақтады, деп хабарлайды @Pavlodarnews.kz тілшісі.

Қатты аяз күндері де Ертістің жағалауында шағын үйрек топтарын кездестіруге болады. Олар өзеннің толқынды ағысында еркін жүзіп, емін-еркін қоректенеді. 

Биология ғылымдарының докторы Қанат Ахметовтың айтуынша, құстар мұнда бірнеше жылдан бері қыстап келеді. Олардың қаңқылдаған дауысы қала тұрғындары үшін үйреншікті әуенге айналған.

– Павлодар маңындағы жылы ағыс Ақсу МАЭС-ы іске қосылған кезден бері бар. Қала үстіндегі Ертіс бөлігі де қатпайды. Дәл осы жағдай су құстарына тартымды болып отыр, – деді ғалым.

Биологтың байқауынша, негізінен саны аздау қырау үйректер 1980‑жылдардың басынан бері Ертісте қыстайды.

– Тоқсаныншы жылдары шағын топ теміржол көпірінің маңында болатын. Кейін мұз баспайтын өзен бөлігі қаланың орталық жағалауына қарай ығысты. Бұл жердің жағалауы азыққа бай болғандықтан, үйректер осында тұрақтап қалды, – деді Қанат Ахметов.

Қыстайтын қырау үйректердің шамамен 90%-ы аталық құстар болып келеді. Кейде қоңыр қаздар кездеседі, басқа түрлері әлдеқайда сирек. Маман желтоқсанда қызылбас сүңгуірлердің бір-екі жұбы да байқаған.

– Қыстайтын қанаттылардың жердің теміржол көпірінен орталық жағалауға ауысуы, меніңше, өзен арнасындағы құмды шөгінділердің қайта орнығуымен байланысты. Бұл азықтың орналасуын өзгертті, – деп толықтырды ғалым.

Әдетте құстар оңтүстікке – Үндістан, Қытай, Пәкістанға ұшады. Бірақ ерекше жағдайлар да болады. Мәселен, өткен жылы мамандар Қызыл кітапқа енген ақбас үйректердің қыстап қалғанын байқады.

Орман шаруашылығы мамандары павлодарлықтарға құстарды мазаламауды ескертеді. Егер қаздар, үйректер немесе аққулар су айдынында қыстап қалса – бұл олардың таңдауы. Жем жеткілікті болса, олар аязды аман-есен өткізеді. 

Павлодарда қыстап қалғандар арасында үйректер ғана емес, сыбырлақ аққулар да бар. Қатты аязда оларды орманшылар байқап, құтқарып қалған.