Мердігерлер көптеген жұмыстарды мерзімінен бұрын аяқтады, деп хабарлайды @Pavlodarnews.kz.

Соңғы екі жылда аудандағы жол инфрақұрылымы дамып, 41 километр қашықтықта асфальтты тас жолдар салынды. Ауылдық ішкі кіреберіс жолдары алты елді мекенде жасалды. Бұл туралы Павлодар облысының әкімі Асайын Байхановқа Май ауданына жұмыс сапары барысында жолаушылар көлігі және автомобиль жолдары басқармасының басшысы Қанат Қашкіров мәлім етті.

Биылғы жылы «Ауыл – ел бесігі» бағдарламасы Баскөл ауылында басталды. Бұл елді мекенде төрт километр жол салынды. Мердігер ұйым – «Павлодар жолдары» компаниясы. Арнайы облыстық бюджеттен 204 миллион теңге қаражат бөлінді. Барлық әлеуметтік инфрақұрылым бойынша жолдар салынып, сонымен қатар, мердігердің өзі демеушілер тарапынан мектеп алаңында, медпункт алдында және мешіт маңында автотұрақтар салып берді. Жалпы барлық жұмыстар мамыр айында аяқталды. 

– Жалпы Баскөл ауылында он шақты көше бар. Көптеген жылдар бойы кіші ауылдарымыздың шешілмей келген жол мәселесі болған еді, қазір кіреберіс жолдарды жасап шақтық. Ол, ең біріншіден, Баскөл ауылдық округінің Жаңатілек ауылына – 3,1, Бозша ауылына – 2,1, және Малайсары округіне – 1,1 километр кіреберіс жолдар жасалды. Бұл жұмыстар мамыр айында аяқталып, пайдалануға берілді, – деп атап өтті Қанат Қашкіров.

Қазір тек бір ғана елді мекенде кіреберіс жол жасалмаған – ол Малайсары ауылдақ округіне қарасты Жаңасарай ауылы. Бұл жолға 197 миллион теңгеге күрделі жөндеу жұмыстарын жүргізу жоспарда бар.

Жалпы аудан бойынша 13 километр жолды жөндеу қарастырылған. Бұл жұмыстарға облыстық бюджеттен 850 миллион теңге бөлінді. Мамыр айында барлық жұмыстар аяқталды. 

– Мақтанып отырмын, аудандардың арасында бірінші болып негізгі жолдардың жартысынан көбі аяқтадыңыздар, – деп қуанды Асайын Байханов. 

«ПавлодарЖолдары» ЖСШ-ның басшысы Рустам Мағзумов айтқандай, осы жұмыстарға  850 миллион теңге бөлінгенмен, 200 миллион теңге бюджетке салық ретінде қайтарылды.

Сондай-ақ, 9,7 миллиард теңгеге Май және Баянауыл аудандарын жалғайтын жол – Ақшиман ауылынан Лекер ауылына дейінгі ұзындығы 36 шақырым болатын төртінші санаттағы жолды жөндеу жоспарда бар.

Алдағы уақытта Май ауданына кіреберіс жолға жаңа асфальт төсеу, Малайсары ауылындағы екі ауылішілік жолды және айналма жолды жөндеуді жоспарлануда. Сонымен қатар, Көктөбе ауылында төрт шақырым жолды аяқтау керек.