Асайын Байханов «Самал» орталығында ем алатын балалардың ата-аналарымен кездесті
Аймақ басшысы жергілікті биліктің ұстанымын нақты түсіндірді: орталықтың жабылуы туралы мәселе көтерілмейді, деп хабарлайды @Pavlodarnews.kz тілшісі.
Бүгін облыс әкімі азаматтарды жеке мәселелері бойынша жоспарлы қабылдау өткізді.
– «Самал» орналасқан ғимараттар мен оларға тиесілі аумақтар басқа мақсаттарға пайдаланылмайды. Ғимарат балаларды оңалту бағыты бойынша өз жұмысын жалғастырады, – деді өңір басшысы.
Алайда орталықтың ғимараты күрделі жөндеуді қажет етеді. Қимыл-қозғалысы шектеулі балалар үшін лифт орнату, есіктерді кеңейту және басқа да жөндеу жұмыстарын жүргізу қажет. Егер бұл жұмыстар уақытында жасалмаса, «Самал» балаларды оңалту орталығында әлеуметтік қызмет көрсету мүмкін болмайды.
Сонымен қатар, осы жылдан бастап өзгерген заңнама талаптарына сәйкес орталық лицензиясыз жұмыс істей алмайды. Бұған дейін «Самал» орталығының әкімшілігіне ең төменгі штаттық норматив пен материалдық-техникалық жарақтандыру талаптарына сәйкестендіріп, лицензия рәсімдеу қажеттігі бірнеше рет хабарланған.
Өңір басшысының баспасөз қызметінің мәлімдеуінше, орталық басшылығы ғимаратты қайта жөндеу кезінде барлық ем алушыларды басқа оңалту мекемелеріне орналастыруды қадағалайды. Ата-аналарға Павлодар әкімімен және жергілікті әлеуметтік қорғау органдарымен кездесу барысында берілген барлық уәделер орындалады. Бұл мәселе облыс әкімінің жеке бақылауында болады.
Облыс әкімінің жеке қабылдауына e-Gov, E-otinish.kz порталдары немесе облыс әкімдігінің WhatsApp нөмірі +7 (702) 166-16-61 арқылы жазылуға болады.
:max_bytes(150000):strip_icc():focal(679x338:681x340)/dolph-lundgren-rockyIV-072922-1-acdd0970ed784184a6be5b9643f4a016.jpg)
