Оның сметасы қайта қарастырылады, деп хабарлайды @Pavlodarnews.kz тілшісі.

Келесі жылы Аққулы ауданында «Ауыл – ел бесігі» бағдарламасы бойынша 19 жоба жүзеге асырылмақ: мектептерді күрделі жөндеу, су құбырын салу, кіреберіс жолдарды асфальттау және балабақшаларды жөндеу. Жұмыс сапары кезінде облыс әкімі Асайын Байханов басымдықтарды атап өтті.

– Алдымен су беру жобаларын жүзеге асыру керек, одан кейін кіреберіс жолдарды жөндеу, әлеуметтік нысандар және ауылішілік жолдар. Тек содан кейін ғана спорт кешендері мен бассейндерді салуды қарастыруға болады, – деді Асайын Байханов.

Аудан әкімі Руслан Мұқанов жобалардың инфрақұрылым, әлеуметтік нысандар, мәдениет және спорт мекемелерін жақсартуға бағытталғанын айтты. Халық өз ұсыныстарын көтеріп, барлық өтініштер ескерілген.

– Білім беру саласында Қызылқоғам ауылындағы Сатыбалдин атындағы мектепті күрделі жөндеуден өткізу жоспарлануда. Жоба мемлекеттік сараптамадан өтті, оның құны – 484 миллион теңге. Мектеп 1986 жылы салынған, жобалық қуаты – 190 оқушы, бірақ қазір тек 48 оқушы білім алуда. Қаражат ішкі және сыртқы жұмыстарға бөлінген. Сондай-ақ аудан орталығындағы «Айналайын» балабақшасын жөндеу де жоспарланған. Ғимарат бейімделген, 2004 жылдан бері жөндеуден өтпеген. Жоба дайын, сомасы – 232 миллион теңге, ішкі және сыртқы жұмыстар мен шатырды ауыстыруды қамтиды. Шарбақты ауылының балабақшасына 340 миллион теңге бөлінген, жоба былтыр дайындалған, – деді Руслан Мұқанов.

Бағдарламаға сондай-ақ үш мәдениет және спорт нысаны енгізілді. Аққулы ауылында облыс әкімінің тапсырмасы бойынша өткен жылы бір миллиардтан астам теңгеге бассейн мен дене шынықтыру және сауықтыру кешенінің жобасы әзірленді. Ішкі жағында жаттығу залдары, душ кабиналары және сауна қарастырылған. Ямышев ауылында 789 миллион теңгеге металл құрастырылымынан жасалған дене шынықтыру және сауықтыру кешенінің жобасы әзірленді. Ауылда мыңнан астам адам тұрады, олардың шамамен 300-і мектеп спорт залында тұрақты түрде спортпен айналысады. Шарбақты ауылында Мәдениет үйі мен дене шынықтыру және сауықтыру кешенінің біріктірілген жобасы дайындалды, болжамды құны – 920 миллион теңге. 

– Келесі жылы төрт ауылда жол жөндеу жұмыстары қажет: Баймолдин, Тақыр, Майқарағай және Шабар. Аққулы ауылының тұрғындары 2,5 шақырымдық жол учаскесін жөндеуді сұрады, соңғы рет жөндеу 2000-шы жылдардың басында жүргізілген. Аудандық маңызы бар Шақа – Шоқтал жолына тастың төселуі қажет, жоба сараптамадан өтіп жатыр, болжамды құны – шамамен 300 миллион теңге, – деді аудан әкімі.

Ауылішілік жолдар да жоспарға енгізілген. Аққулыда 1 700 метр жолды жөндеуге 105 миллион теңге қарастырылған. Тілектес ауылының тұрғындары 1 400 метр жол жөндеу мәселесін көтерді, жоба дайын. Қызылқоғамда 3,5 шақырымға бес көшеге арналған жоба әзірленген, ауылда шамамен 300 адам тұрады.

Екі жоба әзірленіп жатыр – Қарақала ауылындағы 1990-жылдары енгізілген және кейін орталықтандырылған сумен жабдықтау жүйесіне бейімделген су құбырын қайта жаңарту. Тілектес ауылында да су жабдықтау жобасы дайындалуда.

Аудан әкімінің айтуынша, осы жобалардың қажеттілігі ұзақ уақыттан бері көтеріліп келді. Қазіргі уақытта әр үйде ұңғымалар бар, бірақ олардың дебеті төмендеп барады. Кешенді блок-модуль жұмыс істейді, алайда өткен жылы профильдік басқармадан 200-ден астам тұрғыны бар елді мекендерде су құбыры жобаларын жүзеге асыру қажеттігі туралы хат түскен.

Асайын Байханов кейбір жобалардың, әсіресе Аққулыдағы бассейннің қымбаттығына назар аударып, оларды қайта қарауды тапсырды.

– Неліктен бассейн осынша қымбат? Ауыл шағын, бұл Тереңкөл немесе Железин емес қой. Дене шынықтыру және сауықтыру кешенімен байланысын қайта қараңыз, мүмкін басқа жобаны қолдану керек, мысалы, Успен немесе Май ауданы сияқты. Сол жерлерде, менің білетінімше, жобаға аз қаражат кеткен. Жобаны қайта қарап, арзандату қажет, – деді Асайын Байханов. – Облыс мектептерінің барлығын жөндеуге 9,5 миллиард теңге бөлінді, соның ішінде қала мектептері де бар, онда мыңнан астам оқушы оқиды. Біз мұндай жобаларға қарсы емеспіз, бірақ мемлекеттік бюджетті тиімді пайдалану маңызды.

Өңір басшысы ауыл тұрғындары арасында түсіндіру жұмыстарын жүргізуді, жобаларға түзетулер енгізуді тапсырды. Сондай-ақ, ауылға апаратын жолдар бойынша аудан бойынша 100 пайыз қамтуды қамтамасыз ету туралы нұсқау берді.