Наурыз және сәуір айларында ауа райы нормадан жоғары болады деп күтілуде, деп хабарлайды @Pavlodarnews.kz тілшісі.

Бұл туралы «Қазгидромет» облыстық филиалының директоры Маржан Құсайынова мәлімдеді.

28 ақпанда жүргізілген қарды өлшеу зерттеулері бойынша топырақтың қатып қалу тереңдігі, жауын-шашын көлемі, қар тығыздығы және су қоры көрсеткіштері 2024 жылмен ұқсас екені анықталды. Облыс бойынша орташа қатып қалу тереңдігі 146 см, жауын-шашын көлемі нормадан екі есе жоғары – 103 мм, қардағы су қоры 60 мм, қар тығыздығы 0,28 құрап отыр.

Филиал директорының айтуынша, өткен жылы жауын-шашын көлемі нормадан төмен және топырақ қатып қалу тереңдігі аз болған.

– Биылғы жыл 2017 және 2024 жылдармен ұқсас, сол кезде үлкен су тасқындары болған. Ақтоғай, Успен, Ертіс, Шарбақты және Баянауыл аудандары биыл да жоғары қауіп аймағында қалады, – деді Маржан Құсайынова. – 2024 жылы 27 автомобиль жолында су тасқыны болса, бұл да жоғары қауіптің сақталуына себеп болып отыр.

Синоптиктің айтуынша, наурыз және сәуір айларында температура мен жауын-шашын көлемі нормадан жоғары болады деп болжануда.

Облыс әкімі Асайын Байханов күнделікті оперативтік штабқа ақпарат жіберіп, жағдайды бақылауды тапсырды.

Облыстық жер қойнауын пайдалану, қоршаған орта және су ресурстары басқармасының басшысы Сағын Төлеутаев жеті гидротехникалық құрылысты зерттеу қажеттігін айтты. Осы жұмыстарға конкурс жарияланған, оны тек лицензиясы бар ұйымдар жүргізе алады.

Еске сала кетейік, облыста 58 елді мекен потенциалды су басу аймағында орналасқан. Төтенше жағдайлар департаментінің күштері мен құралдары су тасқындарының алдын алуға дайын.