№1 Павлодар облыстық перинаталдық орталығында ұрықтағы даму ақаулары мен хромосомалық ауытқуларды анықтау мақсатында пренаталдық консультация өткізілді, деп хабарлайды @Pavlodarnews.kz тілшісі.

Іс-шара кезінде пациенттермен жүктілікті өткізу, ақауларды түзету және қажет болған жағдайда жүктілікті тоқтату мәселелері талқыланды. Консультацияны перинаталдық орталықтың акушерлік көмек үйлестірушісі Любовь Ходарева жүргізді. Облыстық кардиологиялық орталықтан балалар хирургі, денсаулық сақтау басқармасынан штаттан тыс неонатолог, штаттан тыс генетик, пренаталдық диагностика дәрігері қатысты.

Генетик Татьяна Лучникова әр науқасты мұқият тыңдап, қажетті талдаулар мен ем тағайындады.

- Әрине, тәуекелді толығымен жою мүмкін емес, бірақ мұндай ауытқулардың ықтималдығын азайту және даму ақауларын ерте анықтау жолдары бар, - дейді генетик. – Жүктілікті жоспарлау және дер кезінде дәрігермен кеңесу арқылы тәуекелді азайтуға болады. Жағымсыз әдеттерден бас тарту да ауытқулардың ықтималдығын азайтады.

Дәрігерлер осы орайда әйелдерге скрининг пен диагностикадан өтуді ұсынады. Атап айтқанда, бірінші және екінші триместрдегі пренатальды скринингтер өткізген аса маңызды, дейді медиктер.