Жалпы алты қазандық және үш турбиналық агрегат жөнделді, деп хабарлайды @Pavlodarnews.kz тілшісі.

«ПАВЛОДАРЭНЕРГО» АҚ баспасөз қызметінің мәліметінше, жөндеу жұмыстары екінші және үшінші жылу электр орталықтарында жүргізілді.

Өткізілген жөндеу жұмыстарының қорытындылары және келесі жылға арналған жоспарлар бас директор Олег Щемельдің қатысуымен өткен жиында құрылымдық бөлімшелер басшыларымен талқыланды.

Кездесуде станция қызметкерлерінің және мердігер ұйымдар жұмысшыларының қауіпсіздік техникасын сақтау мәселелері, жөндеу жұмыстарын білікті персоналмен, қажетті жабдықтармен және материалдармен қамтамасыз ету, әлеуетті жұмыс орындаушылармен келісімшарттарды уақтылы жасасудың маңыздылығы қаралды.

– Келесі жылға арналған жабдықтарды жеткізуге қатысты барлық мәселелерді алдын ала пысықтауымыз керек. Ең басты мәселе – біздің жұмысшыларымыздың қауіпсіздігі, жөндеу жұмыстарын тек рұқсат болған және қажетті қорғаныс құралдары бар жағдайда ғана орындауға болады. Мұны жұмысшылардың өздері де түсінуі керек, – деді бас директор Олег Щемель.

Олег Щемель сондай-ақ 2026 жылға арналған міндеттерді белгіледі, оның ішінде жөндеу жұмыстарын уақтылы дайындау, мердігер ұйымдармен үйлестіруді жақсарту және орындалған жұмыстардың нәтижелері үшін жауапкершілікті күшейту бар. Құрылымдық бөлімшелердің өкілдері жөндеу іс-шараларының процесін жақсарту және персоналдың өзара іс-қимылы бойынша өз ұсыныстарын айтты.

Бас директор энергетикалық компания жұмысындағы табыстың негізгі факторларының бірі қызмет көрсететін және жөндеуші персоналдың біліктілігін үнемі арттыру процесі екенін атап өтті.

– Компания үшін маманның «жоғары деңгейге» жетуі маңызды – яғни, өз саласында өзінің тікелей басшысынан артық білуі, түсінуі және істей алуы. Бұл біз орындайтын жөндеу жұмыстарының сапасын тікелей анықтайды, – деп түсіндірді Олег Щемель.

Компанияда атап өткендей, бүгінгі таңда 80-нен астам қызметкер дуальды оқыту бағдарламасы бойынша ЖОО-ларда жоғары білім алуда. Сондай-ақ, цех басшылары мен олардың орынбасарлары үшін жаңа ішкі корпоративтік оқыту бағдарламасын енгізу жоспарланған. Энергетика саласындағы Қазақстан мен жақын шет елдердің жетекші оқытушыларын тарта отырып, лекциялық және практикалық сабақтар ұйымдастыру мүмкіндігі қарастырылуда.