Бұл қалада Дмитрий Шомко, Руслан Ғұмар, Виталий Спарышев секілді былғары доп шеберлері өскен, деп хабарлайды @Pavlodarnews.kz тілшісі.

Қазақстан футбол федерациясының ALAÑ жобасы аясында кеншілер қалашығында 15 толық өлшемді алаң ашылды. Бұл айтулы оқиға №1 Екібастұз қалалық балалар мен жасөспірімдер спорт мектебінде өтті.

Ашылу салтанатына ҚФФ бас хатшысы Давид Лория, Павлодар облыстық футбол федерациясының президенті Ойрат Садуов және белгілі футбол ардагері Евгений Скоробогатский қатысты.

- Бұл екі жыл ішіндегі Қазақстан футбол федерациясының пайдалануға берген 15 алаңы. Биыл сегіз алаңды ашуды жоспарлап отырмыз. Мемлекет басшысы Қасым-Жомарт Кемелұлы Тоқаев отандық футболды дамыту, балалардың кәсіби футболшы болу арманын орындау үшін оларға арналған инфрақұрылымды жақсарту туралы нақты тапсырма берді. Бүгін соның куәсі болып отырмыз. Қазір сіздермен бірге қазақ футболының аңызы Ойрат Садуов осы жерде тұр. Біз оның ойынын көріп өстік, кейін оның қол астында шынығып, жұмыс істедік. Ол Павлодар облысына ғана емес, Қазақстан үшін өте көп нәрсе жасады. Павлодар облысының Екібастұз қаласында қандай футбол аңыздары ойнағанын білгеніңізді қалаймын, - деді Давид Лория.

Аты аңызға айналған жаттықтырушы Евгений Скоробогатский футбол федерациясына, облыс, қала басшылығына қолдау көрсеткені үшін алғысын білдірді. Ол қаланың, облыстың, бүкіл еліміздің намысын абыроймен қорғаған талай футболшыларды тәрбиелеп шығарды.

- Біз жаттықтырушылықпен 1979 жылдан айналаса бастадық, ол кезде «Экибастузец» шеберлік дәрежесіне қол жеткізіп, сол кезде оқу-жаттығу тобы ашылды. Сонымен, мен 46 жыл жұмыс істеп келемін. Осы жылдар ішінде футболшылардың бірнеше буыны өсіп шықты. Солардың ішінде ең атақтысы – Дима Шомко. Ол Қазақстан құрамасында ұзақ жылдар ойнап, алты дүркін ел чемпионы атағын жеңіп алып, Чемпиондар және Еуропа лигаларының топтық кезеңіне қатысты. Екібастұз қашанда талантты ойыншылардың өскен жері болған. Алаң жаңартылып, жаңа киім ауыстыратын бөлмелер ашылғанда бұл дәстүр жалғасады деп сенемін, - деді жаттықтырушы.

Шара барысында жоба елшісі Дидар Сыдықбек жас футболшылармен ашық оқу-жаттығу жиынын өткізіп, естелік қолтаңбаға қол қойды. Ұйымдастырушылар ойыншыларға естелік сыйлықтар да табыс етті.