Бұған өңірдегі мал басының тұрақты өсуі негізгі себеп болып отыр, деп хабарлайды @Pavlodarnews.kz тілшісі.

Облыстық ветеринария басқармасы баспасөз қызметінің мәліметінше, енді жануарларды өсірумен, союмен, өңдеумен, сақтаумен немесе сатумен, сондай-ақ жемшөп пен ветеринарлық препараттарды өндірумен айналысатын барлық тұлғалар биологиялық қалдықтарды дұрыс жоюға қатаң міндетті. Ең басты талап – мұндай қалдықтарды кез келген жерге тастауға үзілді-кесілді тыйым салынады, оларды тек қана мал қорымдары деп аталатын арнайы орындарда жою керек.

– Егер жануар қырылса немесе іш тастаған, не өлі туған төл анықталса, оның иесі бұл туралы тәуліктен кешіктірмей ветеринарлық маманға хабарлауы қажет. Қалдықтарды көму немесе өртеу үшін мал қорымына жеткізуді жануар иесі өз қаражаты есебінен жүзеге асырады. Бұл жауапкершілік тек мал иелеріне ғана емес, жемшөп пен дәрі-дәрмек өндірушілерге де жүктеледі, – деп атап өтті басқарма.

Қазіргі уақытта Павлодар облысында барлығы 239 мал қорымы жұмыс істейді. Инфрақұрылымды кеңейту шеңберінде 2025 жылы екі жаңа мал қорымын салу жобасы әзірленді. Олар Баянауыл ауданының Жаңатілек ауылында және Ертіс ауданының Панфилов ауылында орналасады және құрылысы 2026 жылы басталады.

Бұдан басқа, мал қорымдарының санын күрт арттыру көзделген: 2026 жылы қосымша 48 мал қорымын, ал 2027 жылы тағы 46 мал қорымын сатып алу жоспарлануда. Бұл шаралар биологиялық қалдықтарды қауіпсіз және санитарлық нормаларға сай жоюды қамтамасыз етеді.