Қазіргі таңда өңірде 12 Ұлы Отан соғысының ардагері тұрады, деп хабарлайды  Рavlodarnews.kz.

Бұл туралы облыс әкімдігінде өткен аппараттық жиналыста облыстық  ақпарат және қоғамдық даму басқармасының басшысы Балтабай Қаппасов  мәлім етті. 

– Оның ішінде Павлодар қаласында - 7,  Ақсу және Екібастұз қалаларында, Ертіс, Павлодар, Баянауыл аудандарында бір ардагерден тұрады.  Жеңіс күні қарсаңында ардагерлердің шоттарына 2 миллион теңге мөлшерінде біржолғы материалдық көмек көрсетіледі, сондай-ақ 34 500 теңге сомасына азық-түлік жиынтығы табысталады, – деді Балтабай Қаппасов.

Сондай-ақ басқарма басшысының айтуынша, 1300-ден астам аймақ тұрғынына 150 мың теңге мөлшерінде материалдық көмек  қарастырылған. Олар – Ауған  соғысының  ардагерлері, Чернобыль атом-электр станциясындағы  апатты  жоюға қатысушыларға,  тәжік-ауған учаскесінде ТМД шекарасын қорғаған және  басқалары.  Бұдан басқа, тыл еңбеккерлеріне, қоршаудағы Ленинград тұрғындары мен басқа да санаттарға 30 мыңнан 100 мың теңгеге дейін қарастырылған.  Жалпы мереке күндері  6 мыннан астам адамға біржолғы материалдық көмек көрсетілетін болады. 

9 мамырда барлық қалалар мен аудандарда Даңқ  ескерткіштеріне дәстүрлі гүл шоқтары қойылады. Бүкіл республика бойынша «Ер есімі – ел есінде» патриоттық шеруі арнайы құрылған платформада онлайн-форматта өткізіледі. Бұл әрбір тілек білдірушіге Ұлы Отан соғысына қатысушы туыстары туралы деректерді орналастыруға мүмкіндік береді.

Облыс әкімі Асайын Байханов  бұл бағытта ақпараттық жұмысты күшейтуді, әлеуметтік желілерде түрлі іс-шараларды ұйымдастыруды тапсырды.