Тексеру барысында бірнеше көліктен техникалық ақаулар анықталды, деп хабарлайды @Pavlodarnews.kz тілшісі.

Павлодар облыстық полиция департаменті әкімшілік полиция басқармасының ерекше тапсырмалар жөніндегі аға инспекторы Медет Қайырбековтің айтуынша, жаңа оқу жылы басталар алдында оқушыларды тасымалдауға арналған автобустардың техникалық жай-күйі тексерілген.

– Облыс бойынша барлығы 59 мектеп автобусы тексерілді. Оның алтауынан жоюды қажет ететін техникалық ақаулар анықталды. Бақылау барысында балалардың қауіпсіздігіне әсер етуі мүмкін түрлі кемшіліктерге назар аударылды, – деді ол.

Аға инспектордың сөзінше, анықталған кемшіліктердің қатарында автобустың алдыңғы әйнегіндегі жарықтар және көлікке қойылатын тиісті танымдық белгілерге қатысты мәселелер бар.

Әрбір анықталған кемшілік бойынша жауапты ұйымдарға тиісті нұсқамалар беріліп, ұсыныстар жолданған. Бұл шаралар оқушыларды тасымалдайтын көліктердің қауіпсіз әрі талапқа сай пайдаланылуын қамтамасыз етуге бағытталған.

Сонымен қатар, білім беру ұйымдарының айналасындағы жол инфрақұрылымының жай-күйі де назарда. Тәртіп сақшылары жол белгілерінің орнатылуын және олардың талаптарға сәйкестігін, жол таңбаларының жағдайын, жаяу жүргіншілер өткелдері мен жасанды жол кедергілерінің болуын тексереді.

– Жол белгілері мен жасанды жол кедергілеріне қатысты бақылау тұрақты жүргізіледі. Қазіргі уақытта қаралған учаскелерде қажетті белгілер орнатылған және олар қолданыстағы нормалар мен талаптарға сәйкес келеді, – деді Медет Қайырбеков.

Ата-аналар немесе мектеп әкімшілігі білім беру ұйымының маңындағы жол қауіпсіздігіне қатысты мәселені байқаса, құқық қорғау органдарына жүгіне алады.

Медет Қайырбековтің айтуынша, тұрғындар жол белгісін, жаяу жүргіншілер өткелін, бағдаршам нысанын немесе жасанды жол кедергісін орнату жөніндегі ұсыныстарын арнайы өтініш арқылы бере алады. Әрбір өтініш белгіленген тәртіппен қаралады.

– Егер ата-аналар білім беру ұйымының маңына жол кедергісін немесе бағдаршам нысанын орнату қажет деп есептесе, тиісті өтініш бере алады. Біз оны заңнама талаптарына сәйкес қарап, жауап береміз. Алайда барлық өтінішті толық көлемде қанағаттандыру мүмкін емес. Кейбір аумақтарда мемлекеттік стандарттарға сәйкес бағдаршам нысанын немесе жасанды жол кедергісін орнатуға рұқсат етілмейді, – деді ведомство өкілі.

Мұндай жағдайда жол-көлік инспекциясы тобы көрсетілген аумаққа барып, учаскені зерделейді. Мамандар қажетті тексеру жүргізіп, қорытынды шығарады. Шешім қолданыстағы мемлекеттік стандарттар негізінде қабылданады.

Құзырлы органның мәліметінше, оқу жылы қарсаңында жол қауіпсіздігі мәселесіне қатысты шамамен 32 өтініш келіп түскен. Алдын ала мәлімет бойынша, олардың бесеуі қанағаттандырылған.

Өтініштер Павлодар қаласынан ғана емес, облыс аудандарынан, сондай-ақ  Ақсу мен Екібастұз қалаларынан да жолданған.

Медет Қайырбековтің айтуынша, кейбір білім беру ұйымдары тұрғын үй кешендерінің аумағында орналасқан. Мұндай жерлерде ата-аналар мен мектеп әкімшілігі көліктердің жылдамдығына алаңдап, жасанды жол кедергілерін орнатуды сұрайды.

Жол инфрақұрылымын жетілдіруге қатысты барлық ұсыныс нақты учаскенің ерекшелігі мен қолданыстағы талаптар ескеріле отырып қаралады.

Еске сала кетейік, бұған дейін өңірде оқушылардың қатысуымен 13 жол-көлік оқиғасы тіркеліп, 17 адам жарақат алғаны хабарланған еді. Осыған байланысты оқу жылы басталған кезеңде білім беру ұйымдарының маңындағы жол қауіпсіздігіне бақылау күшейтілді.