«Ертіс орманы» резерватында былтырғы бүршіктерден қарағай көшеттері егіледі, деп хабарлайды @Pavlodarnews.kz тілшісі.

Тұқымдар Семейде сараптамадан өтеді. Өткен жылы қорықта 2828 гектар жерге қарағай көшеттерін егу жоспарланған, алайда орманшылар жоспарды 13 гектарға асыра орындап, миллионнан астам жас ағаш екті. Биыл орман шаруашылығы мекемесінің алдында 2114 гектар жерге ағаш отырғызу жоспары тұр.

Орманшылар ағаш егу жұмыстары үшін бүршіктер мен тұқымдарды алдын ала дайындайды.

– 2024 жылы 949 келі тұқым дайындадық, оның 850 граммы Семей зертханасына сараптамаға жіберілді. Ал биылғы жылы қордағы тұқым мөлшері 38 мың килограмды құрап, өткен жылғы көрсеткіштен едәуір асуда. Бұл тұқымдар әлі өңделген жоқ, – деді «Ертіс орманы» бас директоры Қазбек Ахметов.

Ағымдағы жылы ағаш отырғызу үшін орманшылар жерді өткен жылдардағы өрттердің күйген қалдықтарынан тазартып жатыр. Бүгінгі таңда 778 гектар жер дайын тұр. Бұл ауданға Аққулы және Шарбақты аудандарындағы мектептерді, сондай-ақ жергілікті ұйымдарды тарта отырып, сегіз мың қарағай тұқымы себілмек.