Асайын Байханов өндіріс тиімділігін арттыру үшін жасанды интеллект пен автоматтандырылған жүйелерді енгізу қарқынын күшейтуді тапсырды, деп хабарлайды @Pavlodarnews.kz тілшісі.

Өңір әкімдігінде өңірлік экономикадағы цифрландыру жобаларын іске асыру мәселелері талқыланды. Соңғы жылдары өңірде экономиканың негізгі салаларын қамтитын 25-тен астам ірі цифрлық бастама жүзеге асырылды. Облыс әкімі Асайын Байханов цифрландыру жай ғана сәнді тренд емес, өндірістік үдерістердің тиімділігін арттырудың, еңбек өнімділігін өсірудің және кәсіпорындардың өнімділігін жоғарылатудың берік негізіне айналуы тиіс екенін атап өтті.

Өнеркәсіп секторында заманауи технологияларды енгізудің тұрақты оң тәжірибелері қалыптасты. Атап айтқанда, «Богатырь Көмір» ЖШС базасында диспетчерлік басқарудың автоматтандырылған жүйесі енгізілді. Ол автотехнологияларды, ашылған жыныстарды конвейерлік тасымалдауды цифрлық басқаруды, сондай-ақ жанар-жағармай материалдарының шығынын бақылауды қамтиды. Жұмыс барысында жасанды интеллект элементтерімен карьерлік самосвалдарға мониторинг жасау жүйелері пайдаланылуда, бұл бағыттарды оңтайландыруға және шығындарды азайтуға ықпал етеді.

«Шығыс» кенішінде де өндірістік үдерістерді басқарудың автоматтандырылған жүйелері мен цифрлық шешімдер іске асырылған. GPS-датчиктерді қолдана отырып, техниканы ұшқышсыз басқару элементтері енгізілуде. Ағымдағы жылы кәсіпорынның цифрлық инфрақұрылымын одан әрі дамыту, соның ішінде MES-жүйелерін енгізу жоспарлануда.

Өңір басшысы табысты цифрлық тәжірибелерді агроөнеркәсіптік кешенге де белсенді енгізу міндетін қойды. Бүгінде облыста топырақты талдау, егіс науқанын жоспарлау және суару жүйелерін басқару кезінде цифрлық шешімдерді қолданатын шаруа қожалықтары жұмыс істейді. Дәлме-дәл егіншілік технологиялары, ұшқышсыз ұшу аппараттары және мал шаруашылығындағы GPS-трекинг жүйелері өнімділікті арттыруға мүмкіндік береді. Облыс әкімі бұл тәжірибені өңірдің ауыл шаруашылығы кәсіпорындары арасында оқыту семинарларын ұйымдастыру арқылы кеңейту қажеттігін атап өтті.