Павлодардағы мектептердің бірінде шатырдан өрт шықты
Өрт жөндеу жұмыстары кезінде тұтанған, деп хабарлайды @Pavlodarnews.kz тілшісі.
Облыстық төтенше жағдайлар департаментінің мәліметінше, өрт туралы хабарлама сағат 15:47-де түскен.
– Оқиға орнына келген өрт сөндірушілер ғимарат шатырының профилирленген металл жабын астындағы жылу оқшаулағыш материалдың алдын ала мәлімет бойынша шатырды жөндеу жұмыстары кезінде тұтанғанын анықтады, – деді ведомствода.
Өрт сөндірушілер жеткенге дейін шамамен 10 адам өздігінен қауіпсіз жерге эвакуацияланған. Өрт 16:20-да оқшауланып, 17:22-де толық сөндірілді.
Құтқарушылардың жедел әрекетінің арқасында жалынның шатырдың бүкіл аумағына таралуына жол берілмеді.
– Өртті сөндіру шатырдың «қос төбе» қағидаты бойынша жасалған металл қаңқалы құрылымына байланысты күрделенген. Өрт ошағы профилирленген металл жабынның астында орналасқандықтан, жасырын жану ошақтарын анықтау үшін құтқарушылар тепловизорды пайдаланып, суды тікелей жану орнына жеткізу мақсатында шатыр конструкциясын ашқан, – делінген хабарламада.
Өрттің шығу себебі анықталып жатыр. Зардап шеккендер жоқ.
