Өткен тәулікте тәртіп сақшылары мас күйінде көлік жүргізген 10 жүргізушіні анықтады, деп хабарлайды @Pavlodarnews.kz  тілшісі.

Павлодар облысы полиция департаментінің баспасөз қызметінің мәлімдеуінше, барлық құқық бұзушыларға қатысты ҚР ӘҚБтК-нің 608-бабы 1-бөлігі бойынша әкімшілік іс қозғалып, материалдар облыстың әкімшілік сотына жіберілді.

- Сот жүргізушілерді 15 тәулік мерзімге әкімшілік қамауға алу және 7 жылға көлік құралын басқару құқығынан айыру түрінде жаза тағайындады. Егер де мас күйде көлігін бір жыл ішінде қайта басқарған жүргізушілер қылмыстық жауапкершілікке тартылатынын еске саламыз, - делінген хабарламада.

Мәселен, 29 қаңтар күні таңғы үште Ленин кентінің маңында ПД ротасының қызметкерлері ВАЗ-21099 автокөлігін тоқтатты. Жүргізушінің көлікті басқаруы полицейлердің күдігін тудырған. Құжаттарды тексерген кезде жүргізушіден алкогольдің өткір иісі шыққан. Күдік медициналық қорытындының нәтижелерімен расталды. 

Ақтоғай ауданының тұрғынына қатысты ҚР ӘҚБтК 608-бабы бойынша әкімшілік материал толтырылды. Автокөлік айып тұрағына қойылды. Әрі бұл жүргізуші автокөлікті 7 жыл бойы басқара алмайды.