Бастамашыл топ жаңа деңгейге шықты. Жоба халықаралық сипатқа ие болады, деп хабарлайды @Pavlodarnews.kz тілшісі.

«Қаз қонақ: Жер жадысы» атты халықаралық конференцияны 2028 жылдың шілде айында өткізу жоспарланып отыр. Павлодар География үйінің директоры Александр Вервекиннің айтуынша, жобаның ұраны: «Тарихтың бір сәті де, Жердің бір бөлшегі де жоғалмауы тиіс».

– Біз күш біріктіріп, «Қаз қонақтың» тағдырына қатысты көп жылдан бері шешілмей келе жатқан мәселені шешуді ұсынамыз. Мақсатымыз айқын әрі ауқымды: табиғи ескерткішке нақты құқықтық және қорғау мәртебесін беру, әлемдік деңгейдегі ғылыми-туристік кешен салу, мультимедиялық экспозиция мен білім беру бағдарламаларын әзірлеу, халықаралық серіктестерді – ғалымдарды, экологтарды, сәулетшілерді тарту, – дейді Александр Вервекин.

Еске салайық, павлодарлық ғалымдар мен белсенді тұрғындар бірегей палеонтологиялық ескерткішті сақтау жоспарын бекітуді бірнеше рет көтерген. Бұл мәселе республикалық деңгейге шығып, ҚР Парламентінің Мәжілісінде талқыланды.

Ал осы уақытта «Қаз қонақтың» жағалауы табиғи және антропогендік факторлардың әсерінен бұзылып жатыр. Ертіс өзенінің шайып кетуі, тасқын және ағынды сулар, ластануы бар.

Ғалымдардың пікірінше, ескерткішті сақтау үшін шұғыл шаралар қажет. Жағалауды бекіту, тұрақты мониторинг жүргізу және осал аймақтарды қорғау маңызды. Мемлекеттік және халықаралық деңгейдегі жүйелі қолдау болмаса, «Қаз қонақ» тек физикалық тұтастығын ғана емес, ғылыми және мәдени құндылығын да жоғалтуы мүмкін.

2028 жылғы конференция осы бірегей орынның тағдырындағы бетбұрыс сәтіне айналуы ықтимал.