Қалалық №5 емхананың ғимараты ескі, техникалары тозған, деп хабарлайды @Pavlodarnews.kz тілшісі.

Бұл туралы қаланың тұрғындарының бірі облыс әкімі Асайын Байхановтың Естай атындағы мәдениет сарайында жұртшылықпен кездесуінде айтты.

–   Емхананың ғимараты ескі, бір бөлмеде екі дәрігер отырып, емделушілерді қабылдайды. Тексеретін аппараттары бесінші қабатта, лифт жоқ болғандықтан, зейнеткерлерге көтерілуге қиын, – деді зейнеткер.

Аймақ басшысы емхана мәселесін қолға алатынын жеткізді.

–    Облысымызда ескі емханалар жеткілікті. Кардиологиялық орталық және онкологиялық диспансер күрделі жөндеуді қажет етеді. Бірінші кезекте қалалық №1 емхананың толықтай жөндеу жұмыстарын келесі жылдың сәуір айында аяқтау көзделіп отыр, сол аяқталғаннан кейін балалар емханасы мен №5 емхананы қолға аламыз, – деді облыс әкімі.

Естеріңізге сала кетейік, былтыр күзде аяқталуы тиіс Павлодардағы №1 аурухананың жөндеу жұмыстары биыл аяқталмаған соң келесі жылға шегерілді. Облыс орталығындағы жеті қабатты, үш блогы бар ең үлкен аурухананы жөндеп, жабдықтар алуға 2021 жылы 12 млрд теңгеден астам қаржы бөлінген.