Оқиға облыс орталығындағы банкет залының бірінде орын алған, деп хабарлайды @Pavlodarnews.kz тілшісі.

Тойдан кейінгі келесі күні  бірнеше адам өздерін нашар сезініп, ауыра бастаған. 8 маусым күні іш өту, құсу және дене қызуының көтерілуі белгілерімен жедел жәрдемге 33 адам жүгінген, оның ішінде бір жүкті әйел мен бір бала болған.

–  26 ересек науқас ауруханаға жеткізілді, бала облыстық балалар ауруханасына жатқызылды. Науқастардың барлығына тағамнан орташа ауырлықтағы улану диагнозы қойылды, жағдайы ауыр науқастар жоқ, –  деп хабарлады облыстық жедел жәрдем станциясында.  

Ал 9 маусымда тойға барған басқа да науқастарда медициналық көмекке жүгінген. Барлығы 15 адам жұқпалы аурулар ауруханасына жеткізілсе, 14 адам үйлерінен ем алуға жіберілді. 

– Бүгінгі күні ауруханаға жатқызылғандардың жағдайы интоксикация, диарея және гипертермиялық синдромға байланысты орташа ауыр деп бағалануда. Олар толықтай ем қабылдап жатыр. Ал амбулаторлық емделуден өткендерге ұсыныстар берілді, – деп хабарлады денсаулық сақтау басқармасында. 

Ұзатылған қалыңдық Азиза Исабай мұндай жағдай мейрамхана асханасының кесірінен болғанын айтады. 

– Салат жеген қонақтардың барлығы уланған. Салат жемей, бәліш қана жеп, шырын ішкен  күйеуміз екеуміз және қонақтардың балалары аман қалды. Банкет залының асханасынан сынама алынды, жауабын күтеміз, – деп ашулы Азиза Исабай.

Оның айтуынша, банкет залының әкімшілігі қонақтардың жаппай уланып жатқанын біле тұра, шаралар өткізуді жалғастырып отыр.