«Баянтау» спорт сарайында волейболдан турнир өтті, деп хабарлайды @Pavlodarnews.kz тілшісі.

Ауған соғысы ардагерлері мен мүгедектері қоғамдық қорының төрағасы, облыстық мәслихаттың депутаты Байғабыл Майкотовтың айтуынша, байқау қаза тапқан 36 ауған жауынгерін еске алуға және Жеңістің 80 жылдығына арналып отыр.

– Турнир жыл сайын өткізіледі, биыл бізге ақпарат және қоғамдық даму басқармасы қолдау көрсетті, алдымен іріктеу жарыстарын өткіздік, яғни мұнда ең мықтылар жиналды, – дейді Байғабыл Майкөтов. – Жеңістің 80 жылдығын мерекелеу аясында тағы да көптеген шаралар жоспарланып отыр. Мәселен, жақын арада әскери спорт түрлерінен, армиялық кедергілерден өтуден және экстремалды күштен жарыстар өтеді.

Жарыстың бас төрешісі, жоғары Ұлттық санаттағы төреші Арман Қалиев турнирді өткізгені үшін ұйымдастырушыларға алғысын білдірді. Командаларға сәттілік тілеп, ойынның мәнді де қызықты өтуін тіледі.

Турнирге Павлодар облысының түкпір-түкпірінен барлығы жеті ерлер және алты әйелдер командасы қатысты.