Жарыс екі күнге жалғасады, деп хабарлайды @Pavlodarnews.kz тілшісі.

17–18 маусым күндері Павлодар балалар мен жасөспірімдер спортының орталығына айналды. Қалада Қазақстан Республикасының қолма-қол ұрыс бойынша чемпионаты өтіп жатыр. «Бірлік» спорт кешенінің татамиінде еліміздің барлық өңірлерінен келген ең мықты жас спортшылар өздерінің жас және салмақ дәрежелері бойынша үздіктер атағы үшін бақ сынауда.

Ауқымды спорттық іс-шараны Павлодар облысы полиция департаменті мен қолма-қол ұрыс федерациясы бірлесіп ұйымдастырды. Турнирдің өткізілуі Қазақстан полициясы күніне орайластырылған. Бұл жас ұрпақты әскери-патриоттық рухта тәрбиелеудің және салауатты өмір салтын насихаттаудың маңыздылығын айқындай түседі.

Екі күн бойы көрермендерді тартысты әрі әсерлі жекпе-жектер күтеді. Қолма-қол ұрыс балалардың тәртіптілігін, мінезінің беріктігін және жеңіске деген жігерін қалыптастырады. Ұйымдастырушылар жарыстың жоғары деңгейде өтуі үшін барлық қажетті жағдайларды жасап, әрбір жас спортшыға қауіпсіздік пен әділ төрешілікті қамтамасыз етті.

– Бұл чемпионат – тек медаль мен кубок үшін өтетін жарыс емес. Бұл – жас ұрпақтың мінезін шыңдайтын, тәртіпке баулитын және нағыз спорттық рухты қалыптастыратын мектеп. Татамиде тартыс қызу болатыны сөзсіз, – деп атап өтті Павлодар облысы полиция департаментінде.

Ұйымдасырушылар қала тұрғындары мен қонақтарын болашақ чемпиондарға қолдау көрсетуге шақырады.