Көшелерде жиналатын суды ағызу үшін кезең-кезеңімен жұмыстар атқарылады, деп хабарлайды @Pavlodarnews.kz.

Павлодар қаласында көктемгі қардың белсенді еру кезеңінде көше суын жедел шығару үшін коммуналдық техниканың жұмысы күшейтіледі. Бұл туралы Павлодар облысының әкімі Асайын Байханов @pavlodar_region парақшасында өткен сұхбатта мәлімдеді. Оның айтуынша, алдағы көктемде жыл сайын қайталанатын су басу мәселелерінің алдын алу үшін кешенді шаралар қабылданып жатыр.

Аймақ басшысының сөзінше, 2025 жылы Павлодар қаласында Қамзин көшесінде қайта құру жұмыстары жүргізіліп, жаңа дренаж жүйесі салынды. Бұл – ең көп су жиналатын ықшам аудандардың бірі. Бұған дейін бұл аумақтағы көпқабатты тұрғын үйлердің жертөлелері үнемі су астында қалып отырған. Қазір сорғыш станциялар іске қосылып, тұрақты режимде жұмыс істеп тұр.

Алдағы уақытта дренаж жүйелерін салу жұмыстары басқа да су басу қаупі жоғары көшелерде кезең-кезеңімен жалғасады. Келесі кезекте Ломов пен Академик Сәтбаев көшелерінің қиылысы, одан кейін Торайғыров көшесі мен Назарбаев даңғылы, атап айтқанда И.Байзақов атындағы филармония маңындағы қиылыста дренаж жүйесін салу жоспарланған.

Сонымен қатар қар тазалау және шығару жұмыстары да күшейтілуде. Биылғы қыс ауа райының тұрақсыздығымен ерекшеленіп отыр: соңғы апталарда қар жиі жауып, температура күрт ауысып жатыр. Күндіз қар ерісе, түнде қатты аяз болып, мұз қату қаупі артады.

– Көктемде су баспау үшін қарды бірнеше мәрте толықтай шығарамыз. Бұл жұмыстар жеке секторларда да, көшелер мен аулаларда да жүргізіледі. Сондықтан алдағы кезеңде бұл бағыттағы жұмыстар одан әрі күшейтіледі, – деп атап өтті облыс әкімі.

Оның айтуынша, қабылданып жатқан шаралар Павлодар қаласындағы көктемгі су басу мәселесін жүйелі түрде шешуге мүмкіндік береді.