Өңірге бас мүфти келді, деп хабарлайды @Pavlodarnews.kz.

«Достық үйінде» Қазақстан мұсылмандары діни басқармасының ұйымдастыруымен өткен «Қазақ дәстүріндегі отбасы құндылығы» республикалық танымдық конференциясында Бас мүфти Наурызбай қажы Тағанұлы баяндама жасады.

Конференцияға Павлодар облысы әкімінің орынбасары Айгүл Маликова, өңірдің бас имамы Жолдас қажы Қоспақұлы, дін істері басқармасының басшысы Балтабай Қаппасов, «Нұр-Ана әлемі» қоғамдық бірлестігінің төрағасы Бақытжамал Максилова, зиялы қауым өкілдері, белгілі ғалымдар, отбасылық сарапшылар, дін қайраткерлері, студенттер, жастар және БАҚ өкілдері қатысты.

– Павлодар өңірінде бейбітшілік пен келісімде 13 конфессия тұрады. Бұл әрбір қазақстандықтың дініне деген толерантты және құрметпен қараудың мемлекеттік саясатының нәтижесі. Кез келген халық үшін отбасы – шағын мемлекет. Өйткені, Отан отбасыдан басталады. Мемлекет басшысы Қасым-Жомарт Тоқаев Ұлттық құрылтайда отбасылық құндылықтарды сақтаудың маңыздылығына ерекше назар аударды. Рухани құндылықтар мен ұлттық сана-сезім отбасында қалыптасады, – деді Айгүл Маликова.

Бас мүфти Наурызбай қажы Тағанұлы отбасылық құндылықтардың маңыздылығы және олардың руханиятпен ажырамас байланысы идеясын өз баяндамасында жалғастырды. Ол елдің күші мықты және тату отбасыларда екенін атап өтті. Рухани құндылықтарда өскен бала өз елінің лайықты азаматы болады. 

– Отбасы тек бір адамның емес, екі жақтың да ортақ жауапкершілігі. Ер мен әйел өз отбасына қамқор, қиындықта бірге болуға міндетті. Шариғатқа негізделген отбасы – берекенің, мейірімнің және имандылықтың ордасы. Осы себепті әрбір мұсылман отбасы құру мен оны сақтап қалуға жауапты, – деді бас мүфти.

Оның сөзінше, Ислам дінінде де, қазақ халқының дәстүрінде де отбасы мәселесі үлкен маңызға ие. 

– Ислам отбасын киелі шаңырақ ретінде сипаттаса, қазақ дәстүрі отбасын ұлттық рухтың, мәдениеттің және әдет-ғұрыптың алтын бесігі деп бағалайды. Қыз бала – әдеп пен ибаның иесі ретінде, ұл бала – ел мен жердің қамқоры ретінде ерлікке, батырлыққа тәрбиеленген. Келін – жаңа түскен отбасының берекесі ретінде саналса, күйеу бала – бөтен емес, төрге шыққан құрметті адам ретінде қарастырылған, –  деді ҚМДБ Төрағасы өз баяндамасында.

Кездесуге Әбу-Бәкір Сыддық медресесінің тәрбиеленушілері қатысты. Діни қызметкердің сөзі жастарға әсер қалдырды.  

– Мұндай іс-шаралар өте маңызды. Қоғамды нығайтудағы отбасының рөлінің маңыздылығын асыра бағалау қиын. Әсіресе қазір Қазақстанда ажырасу саны жылдан жылға артып келе жатқандықтан, – деп үшінші курс студенті Әбубәкір Бодавканов. 

Бас мүфти мұсылмандардың діни басқармасында биылғы жыл отбасылық құндылықтар жылы деп жарияланғанын, сондықтан мұндай іс-шаралар циклі жалғасатынын атап өтті.