Концертті Р.Омаров атындағы қазақ ұлт аспаптар оркестрінің сүйемелдейді, деп хабарлайды @Pavlodarnews.kz.

12 маусымда сағат 15:00-де Иса Байзақов атындағы облыстық филармонияның концерттік залында Ертіс-Баян өңірінің руханиятына өлшеусіз үлес қосқан, ән мен күйді өмірінің өзегіне айналдырған сазгер, әнші, ҚР Мәдениет қайраткері Асылбек Әбдікәрімовтің 70 жылдық мерейтойына арналған «Өмірім әнмен өрілген» атты шығармашылық кеш өтеді. 

– Бұл кеш – саналы ғұмырын өнерге арнаған азаматтың әнмен көмкерілген тағдырының айғағы. Кеш барысында Асылбек ағаның жүрегінен туып, жүрекке жеткен шығармаларымен қатар, ел ішіндегі, өңірдегі ардақты ақындарымыздың сөзіне жазылған әндер орындалады. Бұл – композитор мен жергілікті қаламгерлер арасындағы рухани үндестіктің, шығармашылық жарасымның айқын көрінісі, – деді филармонияда.

Концертке Р.Омаров атындағы қазақ ұлт аспаптар оркестрі, камералық хор, «Шаңырақ сазы» халықтық фольклорлық ансамблі, «Ару ана», «Сағым жылдар», «Асыл жандар» вокалдық ансамбльдері, «Жас қанат» студиясы, «Думан» тобы қатысады.