Қыста жеке сектор көшелерінен қар бір-ақ рет шығарылған, деп хабарлайды @Pavlodarnews.kz тілшісі.

Бұл туралы Павлодар қаласының әкімі Хасар Хабылбеков мәлімдеді. 

- Шаһардағы қар тазалау жұмыстарының барысын тексердім. Қысқы кезеңде жеке сектор көшелерінен қар бір рет шығарылған болатын. Қарды қайта шығару жұмыстарын ұйымдастыру міндетін қойдым. Бұл жұмыстар жақын күндері басталады, - деді ол.

Қала әкімі жауапты мамандарға екінші Павлодар және Зеленстрой шағын аудандарында су тасқынына қарсы іс-шараларға ерекше көңіл бөлуді тапсырды. Ең алдымен, тұрғын үйлер мен көшелерді су басудың алдын алу үшін су жиналуы ықтимал учаскелерді тазарту керектігі айтылды.

- Сонымен қатар, орамішілік аумақтарды тазалау жұмыстарын күшейтуді тапсырдым. Көктемгі кезеңде аулалар мен оларға апаратын жолдарды уақытылы әрі сапалы тазарту үшін жұмылдырылатын техника мен жұмысшылар саны артатын болады, - деді қала әкімі.

Айта кетелік, жұмыстардың іске асу барысы тікелей Хасар Хабылбековтың тұрақты  бақылауында болады.