«КАБ» шаруа қожалығы биыл тәжірибе ретінде 20 гектарға бір жылдық дақылдардың бірі – жүгері  өсіруді қолға алған, деп хабарлайды  @Рavlodarnews.kz.

Железин ауданына жұмыс сапарымен барған Парламент Сенатының депутаты Ернұр Әйткенов бұл ретте Жаркент өңірінің төл өнімі саналатын жүгері өсіру тәжірибесін үлгі ретінде келтірді.  

–  Қызылшамен салыстырғанда жүгеріден көбірек қант алынады. Ол жақта бірнеше жылдан бері  жүгері егіп, өңдейді және қант пен шәрбат шығарады. Бұл өнімдерді асханада кеңінен қолданады және шетелге әкетіп жатады, –  деді Ернұр Әйткенов.

«КАБ» шаруа қожалығының басшысы Тимур Қабдулов бұл істе әзірге тәжірибе аз екенін атап өтті. 

–   Биыл 20 гектар алқапқа жүгері егілді. Күнбағыс тәрізді жүгеріні де қараша айына дейін қалдыруды көздеп отырмыз.  Былтыр жақсы өнім берді, алты-сегіз тоннадай жиналды.  Тіпті,  он тоннаға дейін жеткізуге болады деп ойлаймын, – дейді Тимур Қабдулов.

Бұдан бөлек, шаруа қожалығында 300 гектардан астам алқапқа картоп отырғызылған.

 «КАБ» шаруа қожалығының басшысы Тимур Қабдулов – микробиолог, иммунолог. Ломоносов атындағы Мәскеу мемлекеттік университетінің биология факультетінде, Ресей Ғылым академиясының аспирантурасында, Шемякин және Овчинников атындағы биоорганикалық химия институтында, сондай-ақ АҚШ-тың Батыс Вирджиния университеті медицина факультетінің микробиология және иммунология кафедрасында білім алған. 

Шаруа қожалығы 2018 жылы құрылған және өңірдегі озық шаруашылықтардың бірі болып табылады.  Картоп, пияз, сәбіз өсіреді. Өндірістік үй-жайлар мен базалар, қажетті ауыл шаруашылығы техникасы бар.

Парламент Сенатының депутаттары Алтынбек Нұхұлы мен Ернұр Әйткенов  Тереңкөл ауданында бірқатар инфрақұрылымдық нысандардың іске асырылу барысымен танысады.