«Атамекен» кәсіпкерлер палатасы өзен портында екі мамандық бойынша қысқа мерзімді курстар ұйымдастырады, деп хабарлайды @Pavlodarnews.kz тілшісі.

Облыстық кәсіпкерлер палатасы осы мақсатта жұмыс тобының «Павлодар өзен порты» АҚ-ға баруын ұйымдастырды.

Топ мүшелері кәсіпорынның біліктілік талаптарын, сондай-ақ оның оқу және материалдық-техникалық базасының «Атамекен» Ұлттық кәсіпкерлер палатасының регламентіне сәйкестігін тексерді.

Өзен портының ресурстарын зерттегеннен кейін комиссия Павлодардың жұмыссыз азаматтары үшін қысқа мерзімді оқыту бағдарламасына моторшы-матрос және қалқымалы кран краншысы мамандықтарын енгізуді ұсынды.

– Қазақстан өңірлерінде қысқа мерзімді оқыту – бұл «Атамекен» Ұлттық кәсіпкерлер палатасының бағдарламасы. Ол бизнес субъектілері үшін білікті кадр тапшылығын шешуге ғана емес, елдегі жұмыссыздық деңгейін төмендетуге де мүмкіндік береді. Нәтижесінде бұл республикадағы әлеуметтік жағдай мен кәсіпкерліктің дамуына оң әсерін тигізеді, – деп түсіндірді павлодарлық ӨКП директоры Ерқанат Әбенов.

Енді Павлодар өзен порты осы екі мамандық бойынша кадрлар даярлауға құқылы.