Павлодар облыстық ҚАЖ департаментінің қызметкерлері жаза мерзімін өтеп жатқан сотталғандармен бірлесіп, «Өмірді сақта» акциясын өткізуде, деп хабарлайды @Pavlodarnews.kz.

Олар көпқабатты үйлердің терезелерінен балалардың құлауы жиілеп кеткендіктен, акция жариялап, көп балалы және аз қамтылған отбасылардың пәтерлеріндегі терезелерге шектеулер қойып беруді шешкен. 

ҚАЖД қызметкері Динара Махмұдова №45 мекемеде жазасын өтеп жатқандар металл құрылғыларды дайындау цехында жұмыс істейтінін атап өтті. 

– Біз оларға әртүрлі жағдайларға байланысты терезелерге торларды өздері сатып алуға мүмкіндігі жоқ отбасылар үшін бірнеше терезе торын жасауды ұсындық. Бүгін үш отбасына бардық. Енді мұндай оқиғалар болмайды деп үміттенеміз, – деді Динара Махмұдова.  

ҚАЖД хабарлауынша, акция бойынша бір күнде бес отбасы қамтылған. Кейбіреулеріне терезе торлары, ал кейбіреулеріне қорғаныс кабельдері берілді.

Фото: облыстық ҚАЖД