Жыл басынан бері өңірде мыңға жуық тұрғын түнгі тыныштықты бұзғаны үшін жауапқа тартылды, деп хабарлайды @Pavlodarnews.kz тілшісі.

Облыстық полиция департаменті баспасөз қызметінің мәліметінше, түнгі тыныштықты бұзу – ең жиі кездесетін құқық бұзушылықтардың бірі. Мәселен, Қайырбаев көшесінде сағат 3:27-де тұрғындар қатты есікті қағу дыбысынан оянып, жарты сағатқа созылған шуға төзбей, полиция шақырды.

– Досымның мерекесіне барып, кеш қайттым. Үйдің кілтін ұмытып кетіп, есікті қақтым, – деп түсіндірді тұрғын.

Сондай-ақ, Торайғыров көшесіндегі пәтер иесі де әкімшілік жауапкершілікке тартылды. Ол түнгі уақытта жөндеу жұмыстарын жүргізіп, көршілерінің мазасын алған.

– Жөндеу жұмыстарына тым беріліп кеткені соншалық, уақыттың қанша болғанын да ұмытып кеткен, – дейді тәртіп сақшылары.

Түнгі тыныштықты бұзған азаматтар 19 660 теңге көлемінде айыппұл төлеуге міндеттелді.