Байқауға қала мектептерінің 100-ден астам оқушысы қатысты, деп хабарлайды @Pavlodarnews.kz тілшісі.

Қалалық «Жігер» балалар-жасөспірімдер клубы Торайғыров университетінде жыл сайынғы «Жігерлі дауыс» вокалдық байқауының финалдық кезеңін өткізді. 

Байқау 6-9 жас, 10-13 жас, 14-17 жас аралығындағы қаланың жалпы білім беретін мектептерінің 100-ден астам оқушысының қатысуымен «Соло», «Вокалдық топ» номинациялары бойынша іріктеу, финалдық турлардан тұрды.  Оның ішінде ерекше білім беру қажеттіліктері бар 18 оқушы қатысты. Қатысушылардың өнерін Павлодар музыкалық колледжі, Торайғыров университеті, Павлодар қаласы музыка мектебінің вокал, музыка және сахна өнері саласындағы сарапшылары бағалады.

– Байқау шарттары бойынша қатысушылар эстрадалық, халықтық және патриоттық әндерді орындап, вокал техникасын, әртістік шеберлігін және сахналық мәдениетін көрсете білді, – деп атап өтті қазылар алқасының төрайымы, университет оқытушысы Мәдина Валиева.

Байқау қорытындысы бойынша жүлделі орындарға сегіз вокалдық топ, 32 солист ие болды.

Бірінші орынға ие болған вокалдық топтар Ш. Қалдаяқовтың «Ана туралы жыр», Б. Тілеуханның «Елім менің», Е. Хасанғалиевтің «Туған жер» әндерін тамылжыта орындады. 

– Байқаудың соңғы кезеңі әртүрлі мүмкіндіктері бар балаларды біріктіріп, музыкада шекараның болмайтындығын көрсеткен инклюзивті шығармашылықтың нағыз мерекесі болды. Қатысушылар өздерінің музыкалық қабілеттерін, өзін-өзі көрсетуге деген ұмтылысын және музыкаға деген сүйіспеншілігін көрсетті. Іс-шара шығармашылықтың жарқын үлгісіне айналды, онда әр бала өз әлеуетін ашуға мүмкіндік алды, – дейді қазылар алқасының төрайымы.

Жүлделі бірінші орынды иеленген жеке орындаушылар Любовь Афлятунованың «Мамочка, милая мама», Ләйлә Мұқашеваның «Менің елімнің ертеңі» әндерін орындады.