Соңғы жылдары кәсіпкерлер жартылай дайын ет өнімдерін, макарон өнімдерін белсенді жеткізе бастады, деп хабарлайды @Pavlodarnews.kz.

Облыстық кәсіпкерлер палатасында өткен экспорт жөніндегі салалық кеңес отырысында өңдеуші емес экспортты қолдау және бизнеске айналымдағы өнім шығындарының бір бөлігін өтеу мүмкіндіктері талқыланды.

Кездесудің модераторы ӨКП «Атамекен» директоры Ерқанат Әбенов болды. Ол бірқатар кәсіпкерлер палатаға өз сұрақтарымен жүгінгенін атап өтті. Олар тауарларды жақын шетелге экспорттау барысында қиындықтарға тап болатынын айтады.

Павлодар облысының кәсіпкерлік және сауда басқармасы басшысының орынбасары Рашид Кокишевтің айтуынша, 2024 жылы өңдеуші өнеркәсіп экспортының көлемі 2 миллион 557 мың АҚШ долларын құрады. Бұл былтырғы деңгейдің 107,2 пайызына тең. Өңірден шығарылатын жалпы экспорт көлемінде өңдеуші емес тауарлардың үлесі 65,8 пайызды құрады.

–   Жергілікті өндірушілердің тауарлары әлемнің 40-тан астам елінде бар. Павлодарлық өндірушілер өнімдерінің ең ірі тұтынушылары – Қытай, Ресей және Жапония, олардың үлесіне жалпы экспорт көлемінің сәйкесінше 36, 22 және 12 пайызы тиесілі, – деді ол.

Павлодар облысының экспорт бойынша сауда серіктесі болып табылатын елдердің саны жыл сайын 40–45 мемлекет деңгейінде сақталады. Сонымен қатар, кейбір павлодарлық өнімдер сату географиясын кеңейтіп немесе алғаш рет әлемдік нарыққа шығып жатады. Өңірде 50-ден астам белсенді экспорттаушы жұмыс істейді. Олардың қатары жаңа өндірістер есебінен толығуы мүмкін. Атап айтқанда, өңірде мал шаруашылығы мен өсімдік шаруашылығы өнімдерін өндірушілер қосыла алады. Облыс ұн, астықты көптен бері экспорттап келеді, ал соңғы жылдары ет өнімдерінің жартылай фабрикаттарын, макарон өнімдерін белсенді жеткізе бастады.

– Кәсіпкерлер көбіне сыртқы нарыққа шығуда қиындықтарға тап болып, экспортқа тауар жеткізуге деген талпынысын жоғалтады. Дегенмен, отандық экспорттаушыларды ілгерілету үшін мемлекеттік бағдарламаларға қатысу арқылы түрлі шаралар қабылдануда. Мысалы, экспорттаушылардың шығындарының бір бөлігін өтеу «QazTrade» сауда саясатын дамыту орталығы» АҚ, «Қазақстанның экспорттық-кредиттік агенттігі» АҚ арқылы жүзеге асырылады», – деді Рашид Кокишев.

«Қазақстанның экспорттық-кредиттік агенттігі» АҚ сақтандыру және кепілдік департаменті директорының орынбасары Әділ Мұқанов бұл компанияда 22-ден астам қолдау құралы бар екенін атап өтті. Олар түрлі жолмен қазақстандық тауар өндіруші-экспорттаушыларды ілгерілетуге және ынталандыруға бағытталған.

– Біздің қолдаудың негізгі блогы – бұл сақтандыру. Оны бірнеше бағытқа бөлуге болады. Соның ең табыстыларының бірі – экспорттық кредиттерді сақтандыру немесе төлемді кейінге қалдыруды сақтандыру, – деді ол.

Павлодар облысының кәсіпкерлері бұл құралды өте белсенді пайдаланып келеді. Бұл құрал шетелдік әріптес тарапынан төлем жасалмау тәуекелін төмендетуге мүмкіндік береді.