Ол - Қостанай облысынан шыққан Павел Большаков. Жауынгер 80 жылдан астам уақыт із-түссіз кеткендердің есебінде болған, деп хабарлайды @Pavlodarnews.kz тілшісі.

«Майдан жолы» іздестіру жасағының мәліметі бойынша, Павел Михайлович Большаков 1924 жылы туған, Қарабалық ауданының Михайловка кентінің тумасы. Ол 1941 жылы майданға шақырылған. Архив деректеріне қарағанда, ол 1942 жылдың қыркүйегінен бастап із-түссіз кеткен деп тіркелген. Алайда кейін анықталғандай, жауынгер 1941 жылдың қазан айында шайқаста қаза тапқан.

Жауынгердің қалдықтары мен медальоны Ресейдегі «Әскери археология» іздестіру жасағының Капань ауылы маңынан табылған. Соңғы қызмет орны ретінде 82- мотоатқыштар дивизиясы көрсетілген, ол Мәскеу маңындағы қорғаныс шайқастарына 1941 жылдың күзінде және Кеңес әскерлерінің шабуылына 1941–1942 жылдардағы қыс айларында қатысқан.

Көптеген жылдар бойы іздеушілер медальондағы маңызды деректерді жауынгердің туыстарына  жеткізу үшін іздеп келді. Мәскеу жасағының басшысы Антон Торгашев «Майдан жолы» іздестіру тобынан көмек сұрап хабарласқан. Нәтижесінде, олар жауынгердің туыстарымен байланыс орнатып, ұзақ жылдар бойғы іздеу тарихын аяқтаған.

Отбасында батырдың бірде-бір фотосуреті сақталмағанымен, енді туыстары оның қай жерде қаза тапқанын және жерленгенін нақты біледі.

Бұл оқиға іздестіру жасағының жұмысындағы маңыздылықты тағы бір рет дәлелдегендей. 

Осы бағыттағы жұмыстар жалғасуда. Қазіргі уақытта іздеушілер тағы екі жауынгердің туыстарын іздеуде:

• Дюсен Кульджумонов, 1918 жылы туған, Павлодар облысының тумасы. 272-ші атқыштар дивизиясы, 1065-ші атқыштар полкінің кіші сержанты болған. 1942 жылы 13 сәуірде қаза тауып, Вологда облысына жерленген; 

• Махмед Қалиев, 1911 жылы туған, Павлодар аудандық әскери комиссариатынан шақырылған. Оның қалдықтары 2015 жылы Волгоград облысында «Комсомолец» іздестіру тобы арқылы табылған. 

Іздеушілер қаза тапқан жауынгерлердің туыстары туралы қандай да бір ақпарат білетін адамдардың хабарласуын сұрайды. Тіпті кішкентай дерек те отбасының тарихын қалпына келтіруге көмектесуі мүмкін.

Байланыс телефоны: «Майдан жолы» іздестіру жасағының командирі Александр Шитов – +7 777 461 73 78, электрондық пошта: alex.shitov@mail.ru.