Малайсары батыр мектебінде «Мәшһүр Жүсіп оқулары» республикалық байқауының қалалық кезеңі өткізілді, деп хабарлайды @Pavlodarnews.kz тілшісі.

Облыстық «Павлодар дарыны» орталығының мәліметінше, байқауға  қаланың 30 жалпы білім беретін мектебінен  8-11-сыныптың 81 оқушысы қатысты, оның ішінде 38 оқушы жеңімпаз және жүлдегер атанды, бірінші орын – бес оқушы, екінші орын – 12, үшінші орын  – 21.

«Алдым өлең жаз деп қағаз келген, Сөзімді сөйлеп бақтым мен де білген» бағытында бірінші орынды Ә. Бөкейхан атындағы лицей-мектебінің 10-сынып оқушысы Мөлдір Мұратбек иеленді. 

 «Бас болып өнер білсең, тіпті  жақсы» екінші бағытта бірінші дәрежелі дипломмен №29 мектебінің 9-сынып оқушысы Айғаным Мұрат марапатталды.

 «Білімді зерек адам болам!» десең, Қара өзіңді басқаның айнасымен» бағытында Ә. Бөкейхан атындағы лицей-мектебінің 10-сынып оқушысы Ағайша Рамазан топ жарды. 

 «Мәшһүр Жүсіп Көпейұлының фольклорлық мұрасы. Хандар, батырлар» бағытында бірінші орынды  №25 мектептің 8-сынып оқушысы Камила Айтқазинова иеленді.

«Мәшһүр Жүсіп Көпейұлының фольклорлық мұрасы. Би-шешендер, жырау-ақындар» бағытында М.Әлімбаев мектебінің 9-сынып оқушысы Алуа Абраева үздік деп танылды. 

Байқау жеңімпаздары ағымдағы жылдың желтоқсан айында өтетін облыстық кезеңге қатысады.