Конкурсқа 14 облыс өкілдері мен сарапшылары қатысты, деп хабарлайды @Pavlodarnews.kz тілшісі.

Almaty Polytechnic College базасында техникалық және кәсіптік білім беру ұйымдарының педагогтері арасында IT-саласы бойынша республикалық кәсіби шеберлік конкурсы өтті.

Конкурсқа өңірімізден Ақпараттық технологиялар колледжінің оқытушылары: «Компьютерлік ойындарды 3D модельдеу» құзыретіне Бауыржан Мирбеков және «CAD инженерлік графикасы» құзыретіне Борис Григорьев қатысты. Нәтижесінде IT саласындағы пәндер оқытушысы Бауыржан Мирбеков ІІІ орынға ие болды.

–   Байқауға көптеген мықты мұғалімдер қатысты. Екі күн ішінде үш модульді орындадық. Алдағы жұмыстарымызға қолдана алатын көптеген тәжірибе алдық, – деді Бауыржан Мирбеков.

Бес жылдық еңбек өтілі бар ұстаздың айтуынша, модуль бойынша берілген тапсырмалардың барлығын орындап үлгеру үшін әрбір қадамды автоматты түрде жасауды қажет етеді, алайда осы саладағы тәжірибесі аз болғандықтан бірінші модуль А-мен жасағанда қиыншылықтар болған.

Әр жылы өтетін конкурсқа ол екі рет қатысқан.

Естеріңізге сала кетейік, 2024 жылдың қараша айында ТжКББ оқытушылары арасында мұнай-газ саласы бойынша республикалық байқау өткен болатын. Байқауға өңірімізден теориялық және практикалық республиканың арнайы пәндерінің 8 оқытушысы қатысып, химия-механикалық колледжінің оқытушысы Татьяна Гаврилюк І орынды жеңіп алды.